San Pedro, patrón de CuideiruSermones
L'Amuravela - 2003



En el nombri de Jesús
y la Virgin Soberana,
vou ichar l’Amuravela
comu San Pedru asperaba.

Outra vez ya vintinuavi

de juniu ¡¡ pasóu un añu !!

asina qu’aquí nus tianis

pa filicitati’l Santu.

Nun ti queixarás, San Pedru

¡¡ con todu lu que pasamus !!

ya tuvía p’algaravía

quedanus fuarza n’el cuarpu,

¡¡ anqui nus botin la tómbica !!

o nus invadan por Castru

lus tanquis amiricanus,

nu hemus faltar lus pixuatus

pa cumplir co’l riquisitu

que ya nus vian desdi antañu.

Quiaru aprovechar tamián

-porqui sei qu’anda aceñandu-

pa unviai el nuastru saludu

al tou amigu San Pablu,

asina, qu’acomodaivus,

pos con el pirmisu vuastru

ya con el de lus prisentis,

vou imprimar el rilatu.

Comu siampri, cuntareiti

lus socesus que tuviamus,

siandu la mar lu primeru,

que pa esu ya lu más nuastru.

Mira qu’el mundu ya grandi

ya redondu al mesmu tiampu,

pos miou probi, yo nun sei,

nin porquei, comu, nin cuandu,

en sin comprar lutiría

alcontrámunus xugandu:

Foisi en Galicia a piqui

el “Pristigi”, así llamau,

- nu i faía honor al nombri,

taba bian dispristigiau –

ya’l disparramar la carga

dexóunus cuntaminaus,

era unu d’esus barcus...

lus “monu-cascus” llamaus

¡¡ que nun s’enfadi’l menistru

que nun lu tou insultando !!

él, si andaba po las ramas,

ya que taría cazandu.

La quistión ya que tocóunus

acabar pagandu’l patu,

ya llimpiandu galipoti

de las playas ya lus puartus.

Cierrarun lus caladerus

del Atlánticu hasta’l  Cántabru,

a nun ser aquí n’Asturias

que lu fixárun a cachus,

d’esta forma, San Pidrín,

tiníamus dos trabayus:

el de salir a calar

ya’l de dispuás tar llimpiandu.

Pa Pipín el de Santoña,

el nuastru agradicimiantu,

por tar dándunus lus partis

de las maris ya lus viantus,

asina, aú ir recoer

sabiamuslu d’antemanu.

Prumitiárunnus ayudas

que bian tardi nus llegarun,

prigunta-i al fiu Jujú,

qu’anduvu discamisau

una bona temporada,

por nun ricibir lus cuartus,

pos al probi, sin querer

la camisa i disfixárun,

¡¡ el culpabli, Salvador !!

porqui pensóu iba un trapu,

ya dioisla a lus voluntarius

pa llimpiasi lus zapatus,

lu pior, foi qu’al pagaila

quiría facei discuantu,

pos dicía-i, que tamián

él si había llimpiau a un cachu.

 

Estu, San Pedru del alma,

pa prencipiar bian el añu,

era lu que nus faltaba,

pos de magar ricordamus

un iviarnu más pior,

qu’el últimu que tuviamus.

¡¡ Piansu que la zancarrilla,

puánnusla el mesmu diañu !!

Cuandu paez que surdimus,

¡outra vez tamus en sualu!

Las costeras ya ni existin,

tá de moda’l estrafuallu,

la de bunitu cabóusi

un poucu antis de tiampu,

pos anqui’l preciu era bonu

lu pescau iba algu iscasu.

Ya esu claru, a lus que compran

nu is cumbian pa nada el tratu.

 

Nun salimus a mirluza

desde freberu hasta mayu,

pa dai a lus caladerus

unus mesis de descansu,

estu era lu que si facía

cuandu nu había puartu nuavu,

al vinír las invernadas

sobordábamus lus barcus,

hasta la Ilesia llegaban

¿acuárdasti, Patrón Santu?

Dispuás co lus mudirnismus,

rompeu l’avaricia el sacu.

Peru antis d’estu, Patrón

ya duranti’l pasau vranu,

en lus nuastrus caladerus

alguna si que garramus,

hubu días de setenta

ya hasta más kilus por barcu.

L’angula nun si dióu mal,

¡¡ todu nun vei ser queixánus !!

ya’l porcebi, iba a bon preciu,

peru hubu que deixallu,

pos por culpa’l galipoti

hasta Peñas nus cerrarun.

Todu estu ya si subasta

aquí n’a rula del puablu,

asina que las ganancias

paez que van omentandu.

Pa golver a lu que foi

Cuideiru en outrus tiampus,

solu falta que regresin

lus que fan grandi outru puartu.

En el mualli del Oesti

¿nun visti lu que punxarun?

unas barandiallas blancas,

que tan muy guapas, pur ciartu

ya unus bancus pa sentasi,

cuandu tea cansau el cuarpu,

¡¡ talmenti somea Salinas

o ‘l muru de San Lorenzu !!

pa tener la playa ¿guais?

paez vamus avanzandu.

Peru, ¡¡ Quicu !! nin ti apuris,

qu’esta vez, hasta acertamus,

total co lu del Pristigi...

¡¡ nu íbamus poder bañanus !!

Pa’l añu que bian, si puadis...

has ir l’arena encargandu,

peru traila toda xunta

nun quiaras ir granu a granu.

Piansu van por bon camín

las obras que tan faciandu,

ya las qu’iban imprimadas

tamián si fuarun cabandu.

Todas paézmilu a mi

si fixárun con aciartu,

voy nombrátilas Patrón,

asina faemus ricuantu:

Pa meter lus apareus

ya hay almacenis nuavus,

pero al llau d’ellus, ¿güisti?

había qu’arreglar el sualu,

o que contratin a un buzu

por si caemus a un charcu.

Tamián nus tan ampliandu

la esplanada’l puartu nuavu,

pa nusoutrus val d’atraqui,

pa outrus... d’aparcamiantu.

La uficina de tourismu,

istrinámusla isti añu,

pa informar a los touristas

de lu que tianin en puablu,

pa qu’asina tean contentus

ya nu is duala gastar cuartus,

amás, nun puadin queixasi

del tratu que is tamus dandu,

pos en  ver de meteis multas

por aparcar mal el autu,

dámusis un papilín

col nuastru agradicimiantu.

¡¡ comu cambiarun las cousas,

sin Masvindu nin Santiagu !!

Paez qu’ahora garrou marcha

el hogar del xubilau,

pos fai unus mesis ¿guais?

tuvu algu paralizau,

estu, has de precurar

llevallu de la Tou manu,

ya que nun parin las obras

que bian lu nisicitamus

¡¡ mira que si tian que ir

el Churru outra vez a Uviadu !!

vali más al Consejeru

ir dimitiandu del cargu.

Lu que quedóu aparenti

foi el nuavu Yuntamiantu,

con nuava distribución

ya unus salonis bian amplus,

¡¡ hasta tian hidrusmasajis

pa Quicu ponesi guapu !!

Con toa solenidá

el día siati de mayu,

un marasmás d’emportantis

viniarun a nagurallu,

¿nun tuvisti, San Pidrín?

¿mi alma nun t’invitarun?

Foi una pena miou probi

porqui sigún mi cuntarun,

hubu descursus, medallas,

tamián las gueitas tocandu;

pa’l relós, un carillón

co La Red ya’l Pirlindangu,

que fai qu’algunas muyaris,

andin bellandu y cantandu,

Araceli la de Ladrillu,

ya la que li puán más garbu.

Hasta una bandera nuava

pa la ucasión frabicarun,

ahora ya tricolor

¿habrá algún ripublicanu?

De lus premius qu’en Cuideiru

si viniarun entregandu,

quiaru destacar algunu

de lus más sonaus en puablu:

Al mélicu Javier Marcos,

con todu miricimiantu,

po lu bian que nus atendi

ya nus arregla lus guasus,

l’Amuravela de Oru

n’el mes de nuviambri i diarun.

Comu hay que ripartilla

pa dai así más boatu,

al Consejeru’l Tourismu

ya d’Industria del Gubiarnu,

por facer nun sei que cousas

rilativas al sou ramu,

pa quedai agradiciu,

igualmenti lu primiarun.

Co la pólvora de outrus

¡¡ todus matamus lus páxarus !!

¡¡ lus premius pa lus pulíticus...

dispuás de deixar el cargu !!

 

La Nuachibuana esta vez

ricordounus la d’antañu,

pos cantarun po la cai

lus vellancicus pixuatus,

Mingolu, Finu ya ecéteras

ripitilu pa outru añu.

Na Misa’l Gallu ¿güisti?

paez que hubu’n pitu sualtu,

o siría que soltóu

un kikiriki Laurianu,

El Nacimiantu na Ilesia

tá cada añu más guapu,

esta vez, tinía un mulín

de piadra ya en muvimiantu.

En’a vispura de Reis,

lus del Urianti  llegarun

pa traeis a lus niñinus

lus xuguetis ya rigalus,

vinían en cuatru carrozas

ya abondu acumpañamiantu,

dispuás de l’adoración

ya falai al rifugallu,

unus fuaus d’artificiu

hubu pa rigucijallus,

asina que prumitiarun

golver pa’l próximu añu.

 

Mitius ya na Cuaresma

el antroyu cilibramus,

con alligría lus desfracis

po las cais disfilarun.

El primer premiu, ganóulu

un mudistu afamau,

con una pirrina en cuallu

ya las “tos model” al llau,

po’l muvimiantu paicía

qu’iba un poucu afiminau...

Catalina, pa outru día,

dexa’l armariu pechau,

que mi paricia Firiu

el que iba desfrazau.

 



Llegóu la Semana Santa

con mucha xanti po’l puablu,

lus baris... taban a topi,

son lus que salin ganandu,

sin embargu en a Ilesia,

vei la cousa floxeandu,

ya esu que lus cofradis

abondu si tán destandu,

prusicionis hubu todas...

menus las que nun saliarun,

imprimandu comu siampri

por el Dumingu de Ramus,

con una novedá nuava

que tuviamus isti añu,

qu’el Corazón de Jesús,

dorméu fuara casa’l sábadu,

quedóu n’el Aviñaderu

comu si facía antañu.

El miárculis hubu Lárimas,

lavatoriu’l Xuavis Santu,

con una fema que taba

entre lus homis descalzus.

El Calvariu por la nuachi

co’l microfunu fallandu

ya’l barullu nel Patrón

igual que todus lus añus,

el Viarnis Santu llovéu

asina qu’el Santu Intiarru,

tuviarun que suspendellu,

solu hubu Desenclavu.

Las Venias, bian, comu siampri,

fixárunlas sin un fallu

ya dispuás chocolatada

pa cabar la fiasta´l sabadu.

Lus del Pitu, cilibrarun

el santu outra vez cambeau,

ya lu tianin por custumi,

San José vian ritrasau,

la verdá ya que de todu

alcontras n’esus festejus,

fan un llibru pa las fiastas

que lu iscribin con aciartu,

de árbulis, pa m’idea

paezmi algunu plantarun,

si en un globu arostatícu

esta vez todus subiarun

San Pidru, de Ti pa mí

¿qué is falta ya pa outru añu?

De presonajis quirius,

algunus ya nus deixárun:

El vinticincu d’Utubri

morréu el pintor Casaus,

¡¡ tenlu cuntigu, Patrón !!

que foi pixuatu adotau

ya pasió por todu’l mundu

a Cuideiru bian pintau,

¡¡ vaya ispusicionis !! vais

facer ahora nel Cialu,

con el azul de las ninfas,

lus teaus, bian encarnaus

ya lus grisis de la mar

co’l semblanti despejau.

Tamián si nus foi Don César

nus primeirus días de mayu,

al menus sesenta curas

al sou funeral viniarun,

ya hasta tuvu prisidiu

po’l Arzubispu d’Uviadu,

esti sabía´l camín

pa tar cuntigu n’el cialu,

pos amás de ser bon cura,

tamián era un bon pixuatu.

Lus musquitus, Santu Hermosu

¿na más pican a lus calvus?

o tamián a lus barbudus,

comu i pasó a Fidel Castru,

que al paicer unu picóulu

ya encetousi enteru’l granu,

lu que you nun sei muy bian

o al menus nun quedóu claru,

si foi po la picadura

o foi de tantu rascallu,

la quistión ya que paemi

dexóulu tocau del tarru

porqui si non nun s’ixplica

lu de lus fusilamiantus.

Hay algunus mandamasis...

que nun hay pur ú garrallus,

tianis ahí a Mohamé

que un día más taba folgandu,

ya enteróusi qu’era bonu

el pirijil, amás... sanu,

ya nun si ucurri outra cousa

que mandar fuaran buscallu

a un isloti que tian cerca,

peru nun i bastó un puñau

quixu garrar todu’l guartu.

El menistru Fidiricu

-esi que saca lus santus

vistiu de nazarenu-

unvioi p’alli unus barcus,

ya dixuis a lus mojamas:

ala, ala, idi outra vez pa Marruacus

ya si quereis pirijil

que vus lu mandi Arguiñanu.

Piansu que la humanidá

vei día a día inlluquiciandu,

ya en ver de facer las pacis

en guerras nus tan mitiandu,

esi Bush, sin ir más llonxi,

¿paezti tián el juiciu sanu?

dioi por invadir Irak

matandu xanti sin dualu

ya buscandu unas armas,

qu’entuvía nu atoparun,

dicían eran “mas-ivas”

¿subirannus el impuastu?

Hubu manifestacionis

en el mundu pa evitallu,

hasta lu pidiu’l Papa,

peru nun ficiarun casu.

Lu pior, foi que lus nuastrus

bian que i siguiarun el xuau,

al Aznar, güilu you

falar nurtamiricanu,

ya co las patas na mesa

comu’n vaqueru tejanu.

Una medalla de premiu

ya agradicimiantu i diarun,

pos cada vez que la miri... 

que si alcuardi de lus muartus,

porqui’l preciu del pitroliu

esta vez salíunus caru.

Cilibrárunsi ilicionis

el vinticincu de mayu

pa iligir lus concejalis

ya tamián lus deputáus,

lu que a mi mi sorprendeu,

al güir lus risultaus

ya que todus lus partius,

dicían que habian ganau.

Quicu aquí perdeu unu

ya unda lu ta buscandu

¡¡ mira ver bian po la “Braña”

que siguru atopas algu !!

Vei siguir siandu l’Alcaldi

duranti outrus cuatru añus,

asina, que dai salú

pa que siga traballandu

¡¡ ya si animi de una vez

a facer playa n’el puablu !!

Aú tamián tuviamus cambius,

foi en el cleru asturianu,

jubilousi Don Gabinu

ya hay Arzubispu nuavu,

esti, venu de Galicia

ya tian por nombri Don Carlus;

el que tamián nus deixóu,

l’Auxiliar Don Atilanu,

foisi pa Ciudá Rudrigu

en tiarra de castellanus,

deseamusi a lus tres,

sean de dura abondus añus.

¿Quian rompeu la muchila

de Pocholu, Patrón Santu?

acabóusi el pograma

sin desfacer el intuartu,

bian pensei qu’en esi hotel

iba haber más de dos muartus,

lu de la Yola ya’l Diniu,

esu nun importóu tantu,

pos nun si tratóu na más

que un quita p’allá esa manu.

¡¡ vaya camada xostronis

d’una tacada xuntarun !!

si lus iscoin a dredi,

siguru nu aciartan tantu.

Ya ven p’acá, La Pantoja,

visti lu que ta faciandu,

pa que nun la torei nadi,

paemi que golveu al ruadu

ya de premiu, vei llevar

las dos oreas ya’l rabu,

lu pior, ya pa la outra,

na más li quedan lus cuarnus,

vei mandar ella en Marbella,

más que Gil tuvu mandandu.

Lus diportis tan en boga

pa lu bonu ya lu malu,

el iquipu de fugol

que riprisenta a esti puablu,

golveu quedar campión

y’amás en el primer puastu,

ahora tá na preferenti

¡¡ teneis que siguir subiandu !!

ya diantru poucu xugar

contra’l Xixón y’al Uviadu.

a Isidoru y’a Morán

la noraguana lis damus

y’a todus lus fogolistas,

el nuastru agradicimiantu,

por facer grandi Cuideiru

ya tamián a lus pixuatus.

Igual que Fernandu Alonso

tá co lus cochis faciandu

ya prisumiandu a la vez,

de ser un bon asturianu,

has embotallu un misguín,

pa qu’omenti lus caballus

ya poda co la Tú ayuda,

ganar el campiunatu.

Paemi Santu Patrón

qu’estu ya vei acabandu,

solu ti quiaru pidir

que nus sigas ayudandu,

que salgamus a la mar

en busca’l sostentu diariu

ya podamos regresar,

con peixis, sanus ya salvus.

Danus la Tú bindición

ya esperanus n’el cialu,

peru precura que sea

cuando todus seamus viayus.

Ahora vou dar unus vivas

¡¡ ya tuvu bian de rilatu !!

que toca sisión vermú,

comer ya ichar un pigazu,

pa que dispuás na verbena

podamus siguir bellandu

ya ti honremus, San Pidrín,

comu vianis miriciandu.

¡¡ Viva San Pedru Gloriosu,

Apostul ya Patrón nuasu !!

Pa San Pablu, con cariñu

¡¡ tamián outru viva i damus !!

¡¡ ya pa San Pablín, nun piansi,

qu’el sou viva ulvidamus !!

¡¡ Viva Santa Anina hermosa,

San Antoniu ya Santiagu !!

¡¡ Vivan lus santus antigus

ya vivan todus lus nuavus !!

¡¡ Que vivan lus mediu santus

que son lus llamaus beatus !!

Un viva pa’l Santu Padri

que golveu vesitanus.

¡¡ Vivan las otoridadis

que tan d’istrena isti añu !!

¡¡ Vivan tamián lus que siguin,

ya lus que si ritirarun !!

¡¡ Vivan todus lus prisentis,

forasterus ya pixuatus !!

¡¡ Vivan lus que tandu llonxi,

suañan con golver al puablu !!

Pos pa que podan güilla,

ya si emocionin de pasu,

vou a ricitar la copla 

que ya nus vian desdi antañu.

y’anque quedi sin risuallu

piansu gritalla bian altu.


¡¡ Mientras Cudillero viva
y duri la Fuenti'l Cantu,
va San Pedru a la Ribera
con todus lus demas Santus !!



¡ Amura vela ! 
¡ Isa vela !
¡ Fuego a babor ! 
¡ Fuego a estribor !

¡¡¡ Viva Pedro !!!


Cudillero, 29 de Junio de 2003



Escrita y recitada por
Cesáreo Marqués Valle