En el nombri de Jesús
y la Virgen Soberana,
vou ichar L’ Amuravela
comu San Pedru asperaba
comu lu desea ‘l puablu
ya ‘l Gremiu, que n’ us Festejus
yá la parti enteresada.
iGloriosu Patrón San Pedru,
Apóstul el de más fama,
atendi a esti mariñeiru
que con toda fe ti aclama!
Puán de Porteru a San Pablu
pa que falemus con calma.
Poucu tengu que cuntati:
En’ u que toca a esti puablu
de pesca, ¿qué vou diciti?
si hay quian non ganóu un perru..?
El mijor foi Barrabás,
que foi pescar al sarreu
ya ‘n vez de garrar botonas
trouxu un raposu bian prietu.
De bariqui nin barruntu,
de tuliña… a lu que veu
vénunus p’acá esa plaga
d’esi llongueirón pequeñu
qu’ hasta pa velu de cerca
pricísasi d’ispijualus;
quiar apuntar el chicharru
peru damus el camelu,
déixasi ver ya dispuás
iscuándisi más pa diantru.
Ven ichanus una manu
co la tu Fé n’el Maestru.
Ahora falemus del mundu,
que tá feichu un embelecu:
las cousas que tán pasandu
de magar nunca si viarun.
¿Quias creer, qu’ hasta las horas
mus roban po ‘l istraperlu?
El Sol que mus punxu Dios
ya nun manda nin gubiarna,
lus relós que fan ahora
cuarrin mâs que las istrellas;
non desaxeru palabra:
Sabrás que, falandu d’estu,
las muyaris en’ a Plaza,
dixu Antona la Guayona
qu’ el llunis a la tardada
diáruni las diaz en Pravia
ya cuandu llegóu a Cuideiru
taba ‘l Sol unda en Santa Ana.
¿Ya quián ya’l Santu encargáu
(has dicímilu en cunfianza)
de virar l’aguya al tiampu
que nun aciarta migaya?
Ou tá chochu ou nun tá cuardu
porqui bona nus la arma.
Lus mazanus de don Piu
diarun mazanas n’iviarnu,
el vranu venu en freberu
ya en mayu hasta fríu feixu;
¿quiás más que venu la niavi
n´esti mes en que corremus?
Lus viantus cambian de rumbu
más que un virón de lus neñus,
cuandu piansas ya foranu,
guálvisi viantu gallegu.
D’estus trastornus que pasan
¿sabis lu que mus allegra?:
Ver lloucas a las aldianas,
que nun sabin cuandu seman
nin cuándu coin las indianas.
Quéixansi de que hay siquia,
de que ahora vénuis l’agua
cuandu nun la nisicitan…
Siampri tán RAÑA QUE RAÑA
ya ganan mâs que “Ruschil”,
esi xudiu de fama.
Nu is faigas plizca casu
déixalas que s’iscombatan.
Munchu nuavu hay n’esti mundu,
si baxas plasmas d’afeichu.
D’ inventus andamus bian,
de pan … cuasi non lu vemus
¿Pensarán alimentanus
con algún inventu nuavu
de pelleus de lentejas,
de billotas u outrus cuantus?
Ya, non piansis, non morremus
tamus durinus ya tiasus.
¿Güisti?: Van metési ahora
co la Lluna ya lus cuarnus,
quiarin dir a vesitalla
(pa mi qu’ han robai lus “cuartus”).
Que nun van salir con bian
van velu más que de priasa,
que yá la Lluna muy viaya
ya tamián ya muy llagarta.
¿Nun ves que co las mareas
fai lu qu’a ella i da la gana?
Pos, ¡mi alma! si s’ incabrita
lu mesmu is da una tuñada.
¿Tas enterau, Santu Hermosu,
d’ esi estrumentu modernu
qu’ el nombri precipia en ONU
ya nunca dicin el restu?
Pos, que lu sepas, Patrón,
ahí non quixarun metenus,
dicin que España nun cabi
peru tamus tan contentus.
¡Tar mezcláus con esa xanti
que falan comu lus perrus,
qu’ andan mitiándusi en guerras
pa que outrus lus ayudemus…!
Nun son plizca de fiar;
si nus metin n’esi cuantu,
ellus iscapan, siguru,
tapan ya déixannus diantru.
Non sei; con esas visionis
de tela qu’andan fayandu
ningunu tamus siguru:
hasta na mar nus tán viandu.
¿De ú sacarán esa “tela”?
Has enterati, San Pedru,
lu mesmu la fai el diañu
pa engolvenus n’el ifiarnu.
Nun taba de más, Patrón,
qu’icharas una mirada
ya repararas el Puartu:
¿Non ti paez comu a mi,
que tán mal lus inginiarus?
Cuartus llevarun abondus
peru non séi qué fixarun,
cada vez tamus pior,
fundiar apenas podemus.
Tamus temblandu, miou probi.
querán facer outru arreglu
ya que non nus quedi mar
nin pa dar una salea
pa pasiar lus forasterus.
Ya has dicii a San Miguel
cuandu non tea de faema,
venga dar el día que poda
un pasiín po la Tiarra
ya vaya po lus cumercius
a contrastar bian las pesas,
porqui entri papel ya mermas
non mus da nin pa un yantar
lu que nus vendin n´a tienda.
Al “Campuamor”, en Uviadu,
fuarun bellar las rapazas
Giraldillas, Descansau,
Pirlindangu ya las Danzas.
Fixárunlu más que bian,
daba gloria contemplallas,
si nu is diarun un bon premiu
non foi que non lu ganaran;
peru’l públicu d’ Uviadu
aplaudióluas que rabiaba,
ya dispuás de bellar ellas
quedóu la sala midiada.
Al puablu en muy bon llugar
deixarun estas rapazas
pa que Cuideiru en Asturias
poda figurar con fama.
Ya, falandu de muyaris,
vou dar aqui una puntada:
Nun hay quián las incarrili,
andan del todu rigualtas:
Fuman, biabin, guian “haigas”
ya montan en becicleta,
van en avión po lus airis,
son soldáus ya hasta torean;
menus faer lu que debin
nu hay cousa en que non si metan.
Guay nun hay que pretendellas,
son ellas las que lu arreglan,
ya non puadis discuidati
que disiguida t’inredan.
Ellas son las que ti plizcan
ya las que fan las zalemas…
You ya nun tou n’esus pasus…
peru siántulu, non creas;
ya non quiaru ixpansionami
por si anda la muyar cerca.
Díguti que tá arreglau
el que n’estus tiampus casa,
que las mucinas non quiarin
fregar nin pelar indianas,
nin mendati lus calzonis
nin cuásiqui faer la balda.
Nun quiarin porque ¿nun sabis?,
llevan las uñas pintadas
ya de pementón nus llabius
una llibra bian pesada.
Pinturas ya marimachus…
bian el diañu las engaña.
Ya si por un buraquin
pal nuastru mundu miraras,
has facelu con cuidiáu,
nun vayas meter la pata:
¡mi alma! puadis cunfunditi
ya pensar que Xuan yá Xuana.
Ahora ya vamus deixati
por si algunu ti reclama.
¡San Pedru, hasta l´ outru añu!
Aténdenus co la tu gracia,
ayúdanus en’a mar
pa ganar lu que fai falta
pa sustentanus el cuarpu
ya pa salvanus el alma,
ya has abrir prontu la puarta
si algún pixuatu ti llama,
anque sea un mijicanu
por ser rumbousus de facha,
qu’nviarun pa las Fiastas
siati mil pesetas llargas.
¡Cúidalus bian, San Pidrin,
que nu is pasi cousa mala,
que ganin moneda abonda
ya volvan p’acá a gastalla.
A la Cumisión las gracias
por lu muchu que trabaya
ya por rifar esi arrradiu
que todus lus sonis canta,
ya con tal qu’a mí mi toqui
déxuvus que faigáis trampa.
iViva Pedru, viva Pablu,
San Xuan, San Roqui y “Compaña”!
iQue viva ‘l Gobernador
ya ‘l Alcaldi, que Dios quera
tenga en sos manus la vara
mâs añus que, sigún mentan,
vivíu Matusalén,
que paemi fuarun milenta!
¡Vivan las Otoridadis
de la mar ya de la tiarra
que vivan esas rapazas
que bellarun pa las Fiastas,
tamián las que nun bellarun,
que vivan todas las neñas
ya pa que nun tean rañandu:
¡Vivan un piacín las viayas!
¡Vivan tamboris ya gueitas,
las Orquestas ya la Banda
ya ‘l que is marca co na manu
con qué viantu han de tocalla!
Ya ahora ¡venga un pasodobli
pa marchanus pa La Plaza!
Peru antis hay que cantar
lu que tian en puablu fama:
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA
CON TODOS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!