En el nombri de Jesús
y la Virgin Soberana,
vou ichar l’Amuravela
comu San Pedru asperaba.
¡Filicidadis, Patrón,
Gloriosu Apóstul San Pedru,
si de la Ilesia sos piadra,
tamián de quí sos cimiantu!
¡El San Pedru más rumbosu
que lus ñacíus magar viarun!
Con grandi satisfaición
todu esti puablu pesqueru
pa ricordati mijor
aú ganabas el sostentu,
desdi un barcu ti saluda
ufriciánduti´l festeju,
que tá el xintíu que ribuy
d´alligría ya contentu
pa honrar al nuastru Patrón.
¡Guay ya nuticia Cuideiru!
Nun da más que pasin siglus
nin que haiga outrus socesus,
nin lus viaxis a la Lluna,
nin paséus po´l fermamentu:
en llegandu la Tóu fecha,
¡lu que val sos Tú, San Pedru!
¡L´Amuravela ta firmi
en faceti acatamiantu,
que si si rompi esti filu
que ya el nuastru falamentu,
nun queda nada d´antañu,
cabóusinus lu pixuatu!
¿Nun ves que ya tan botandu
casas qu´iban menumentus,
de xantis d´istima antigus,
comu iba el llamáu Aleju,
que facía aquellus briquis,
marañualas, insurreutus,
las crucetas ya picadas,
las xiringas ya outrus cuantus,
lus rosconis ya las tartas,
con clema fuara ya diantru?;
ya iba el que regalaba
el roscón d´ufricimiantu
qu´el día “La Candelaria”
rifaban n´a Plaza en mediu.
¡Munchu rinombri tuviarun
aquí ya en outrus concejus!
Ya con esta ricordanza
nun queremus faer de menus,
al contrariu, aponderallus,
a lus que de Grau tenemus.
Si de prisencia son bonus,
esbabáyasti al comellus;
si non facedi la proba…
peru ponéi babadeiru.
Outra casa van tirar
qu´iba tamián d´abolengu,
peru tian que ser asina
porqui hay qu´enanchar el puablu,
ya ponesi, has entendemi,
en altura a lu moderu.
De las que han faer n´a Plaza,
lus “moquetus” ya lus viamus.
Antis de dati las nuavas,
faerémusti el nuastru fallu:
Tamus más que agraicíus,
l´iviarnu nun foi muy malu,
algu siampri si pescóu,
anqui hubu algu más de paru.
La costera de bunitu
foi bona, esu sí pur ciartu;
húbulus d´abondus milis,
outrus menus, pur supastu.
Chicharrón ya palometa,
nada, nin mirez mentallu.
Lus botis de la baxura
tuaviamus d´algún trupiazu
por mor de que las volantas
n´us mesis d´abril ya marzu
gulviarun a las andadas
en sin dengún miramiantu:
n ´a Maruca ya n´a Piadra,
que son caladerus nuastrus,
con esas artis modernas
nun deixan cría nin rastru.
Hubu sus más ya sus menus
peru con prodencia´l cantu.
El diariu “La Voz d´Asturias”
foi el que faláu del casu,
asina que desde quí
las gracias por ellu i damus.
Outra fichuría nus feixu,
qu´engarlitu la garrarun,
la lancha “La Bian Amada”,
qu´iscapóu más que curriandu.
Peru dispuás, Santu Hermosu,
comu pa querer primianus,
venu mirluza a destaju,
ya bisugus, ya gurguys,
que ribosaban lus barcus.
La Premavera foi fría,
venu a finalis de mayu,
por esu lus de l´ardora
muy pouca cousa pescarun,
qu´el bocarti nun surdía
ya mitíasi pa baxu.
Amás quedaba muy llonxi,
xunt´a Francia agazapaú;
pa´l añu que vian, Patrón,
has dánuslu más cercanu,
pa que podamus ganar,
que toudus semus crestianus.
Ahora, San Pedru binditu,
nun ya comu n´us Tús tiampus:
amás de bregar a fondu
co las folas ya lus viantus,
hay que lluchar co lus homis
ya vadíar lus incuantrus
con gallegus ya franchutis
que quiarin engadellanus.
Todus tenemus razón
pero naidi ta d´acuardu.
Baxu la Tóu pruteición
sigui´l puablu posprerandu:
nuavas motoras ya botis
de toda clas ya tamañu;
haylas “maxis”, “midis”, “minis”,
comu las sayas de llargu.
Dos bonas prifumirías
con prifumis de lus carus,
ya si nun lus quias tan bonus,
haylus tamián más baratus.
Ya pa que toudu sea a paris,
dos churrirías s´abriarun,
mecánicas, que lus churrus
fansi solus, sin tocallus;
unus son pa´l chocolati,
lu mesmu ispesu que claru,
la outra failus pa´l café,
de lu bonu, en sin ricualu.
Tan priparandu na´s obras
que si van faer pa´l puartu,
una carretera nuava
detrás de la Casa´l Fuau;
imprincipia en Villamar
hasta Barera baxandu;
dicin son lus priminaris
pa dispuás faer lus trabayus;
peru quixáramus ver
algún mayor adelantu…
El puablín sigui´l sóu rumbu
en sin sucidíus istrañus;
venu la gripi dos vecis,
peru nun feixu gran dañu;
bodas de pustín, abondas,
ya muartis que las sintiamus.
La mocedá tian de sobra
con quéi rivirtir el cuarpu:
en´a “boiti”, en´us baris…
ya ristrinóusi n´El Pitu
la Pista d´añus pasáus,
que ta más a la moderna,
con todu luju ya ornatu;
llénasi de muciríu
que nun queda ni un asiantu.
Ya si sabi qu´estus sitius
tan pruhibíus pa lus viayus,
qu´al ver tanta chavalina,
puadi intucásiis el fégadu.
Iligiamus una “Maja”
(nun vamos aquí ser menus):
tocanti a mucinas guapas,
nun tian qu´invidiar Cuideiru.
Foi una “Maja” bian Maja,
acertóu bian el xuráu,
que n´el cuncursu d´Asturias
foi de las que más gustarun.
Pa outru añu, si Dios quiar,
ha habellu tamián de “Majus”.
Aparti las rivirsionis,
tamián si van culturandu:
más de trenta chavalinas
muchas cousas diprindiarun
en el Sirviciu Social,
ya bonas notas tuviarun.
Dámusis la noraguana
po lu bian que si portarun.
Esti añu lu que faltóu
fuarun, ¿guais?, lus Reis Magus;
dicin que con tanta niavi,
lus camellus isguriarun.
Peru por outrus cundutus
pa lus neñus unviarun
lus xuguetis qu´asperaban,
ya asina si conformarun.
En cambiu tuvu mijor
ya con gran ricuimiantu
la Semana Santa, ¿güisti?,
que ricordóu las d´antañu.
Un flairi pidricador
n´el sermón llamáu ”L´Incuantru”
feixu llorar a la xanti
con tantu fervor falandu.
A las onci de la nuachi
foi po la cai “El Calvariu”;
comu convinía la hora,
hubu un xintíu disiartu.
Ahora, pa sirvir a Dios,
tian que ser con más regalu,
que ya enancharun la puarta,
qu´iba istrecha, pa ir al Cialu.
En´a Primeira Istación,
por poucu ya la istruzamus;
ya foi que de lus dos homis
que al lleitor van allumandu,
a unu d´ellus, que siguru
taba un poucu afumacáu,
temblabái la viliquina
muviándusi pa lus lláus.
En esi mesmu momentu,
“Eto” sacóu un ritratu
ya co´l risplandor flash,
toudu s´apuróu diciandu:
“Santiagu, apura la boga,
qu´a la Quinta nus llegamus;
vi you el primer rillustri,
la tormenta vei garranus”.
Menus mal qu´ibamus poucus
lus que tábamus cercanus
ya pudimus contenenus
pa siguir el rezu santu.
El Intiarru del Siñor
foi de lu más ponderáu.
Nun faltóu misa yé-yé
ou pop, comu quereramus,
ya foi pa la mocedá
qu´ellus mesmus la entamarun.
Venu el Siñor Arzobispu
co la su vesita a honranus
pa consagrar el altar
que ya´l que tenemus nuavu.
Siñor de munchu saber,
gran mozu, ya campechanu.
La verdá que munchu hubu
por esus mundus de malu.
N´a media metá d´Uropa
nun si ricuarda outru iviarnu
de tantas niavis ya fríus,
enondacionis a pastu,
sísmicus ya aterremotus,
milis d´hiríus ya muartus,
unus disaparicíus,
otrus en choquis d´autus
u d´avionis encendiáus,
casas ya puablus barríus
en sin que quedi nin rastru;
a outrus pasáis a la enversa,
que si llevantan del sualu.
La catombi de Perú,
que foi algu istrurdinariu:
más de trenta mil cadavris
murriarun toudus al tiampu.
Unus allucis de niavi
qu´a enocentis enterrarun
n´un sanatoriu de Francia
miantras durmían cunfiáus.
Peru lo que ta de moda,
miou probi, son lus sicuastrus
de neñus ya de manatis
ya d´avionis disviáus,
que si vas facer un viaxi
a París, pongu por casu,
en ver d´ir al tóu distinu,
llévanti pa Fidel Castru;
ahora la piratiría
ta más po´l airi qu´en barcu.
“L´Apolu Doci” llegóu
a la Lluna en sin trupiazu
fai onci mesis, Patrón,
ya munchu foi cellebráu.
Dos de lus astromonautas
na Lluna desembarcarun
ya sobri ella, ¿guáislu Tú?,
un misgaín pasiarun.
Andaban comu a saltinus
ya unu caéu al sualu;
l´outru quedóu n´a casulla,
di siguru vixilandu.
Truxarun piadras ya tiarra,
dicin que pa analizallu.
Foi la hazaña d´esti siglu
ya´n trunfu lus ricibiarun.
Ahora que el “Apolu Treci”,
la verdá, foi un frescasu.
¿Cómu nun si diarun cuanta
qu´iba un número plagáu?;
peru nun hay que creellu
que al paecer ya pecáu.
Dicin foi un arulitu
que chocóu co´l aparatu.
Co la Lluna, ta sabíu,
nun si puadi andar xugandu,
crez ya mingua cuandu quiar,
ya sigún i dea el rautu,
pon lus cuarnus al cricianti
u al minguanti si ya´l casu.
L´astromonauta más cucu
foi el que si punxu malu
porque i dióu el sarapicu;
San Pedru, ¿nun ti paez
que i dióu con munchu ritrasu?
¡Esu aquí sal a lus neñus!,
siguru s´intivocarun,
ya saliríani esas pintas
de comer algu enlatáu.
Al llibrasi del piligru
ya qu´a Dios taba allegáu.
Ya, ¿pa qué quiarin traer
esas piadrucas del sualu?
¿Pa ver si son deferentis
de la Tiarra qu´habitamus?
Sabíu que´l Oniversu
foi de la nada formáu,
Dios nun usóu matirialis,
sólu el homi foi de barru.
Tan priparandu la paz,
peru comu tardan tantu,
outras cuatru guerras, ¿guais?,
n´estus mesis imprimarun.
Siguin frabicandu bombas
ya misilis ya petardus
con armamentus nuclaris.
La China ya entróu n´el aju
faciandu d´esus estélitis;
ya mandóu unu al ispaciu;
a un suponer, piansu you,
que tian que ser amariallu…
Ya si ti cuntu, Patrón,
lu qu´en mundu ta pasandu,
lu que s´isquibri n´a prensa,
lu que falan po´l arradiu,
lu que na tilivisión
vemus ya güímus a diariu,
lu que danzan lus menistrus
ya lu que si tan destandu,
virías qu´a cada hora
hay un acunticimiantu,
nin pasa día tampoucu
sin que haiga un enventu nuavu.
Fansi creaturas en vidru
que son lus fíus del frascu,
la madri ya la “pobreta”,
¿aú ta´l alma, Apóstul Santu?
¡Lu que han salir son femónemus
d´esus melandrus masáus!
Ya saberás por el Papa,
que ya´l Tóu socesonariu,
qu´algunus curas nun quiarin,
¿güisti?, ser cilibatus.
Ahora lus que lu pidin
son homis que tan casaus.
¿Entendis Tú esti belén…?,
cunsúltalu con San Pablu.
Pa´l mi paecer, el mundu
ya un duviallu enrevesáu,
sin nun ta patas pa riba,
ya que ta cabeza abaxu.
Tamus copáus de “ye-yés”,
lus “hipis” siguiin hipandu,
unus vistíus de probis
ya outrus mijor portáus;
haylus de distintus motis,
van cada vez omentandu.
Monsergas, cantus ya bailis
co la pirlisía en cuarpu,
nun estrozan lus güíus
porqui ya tan estrozaús;
milenas, barbas, patillas…
esu en todus ya lu dáu.
Fistivalis a trompón,
cuncursus ya campionatus
d´esportis de toda clas,
fugól, boxeu, balónmanu,
rubís, iskís, bamboleús…
de ciclismu, ¡nun digamus!,
ya nun séi cuántas ecéteras,
porque si non, nunca acabu.
Antis co lus bolus, brisca,
la lutiría, ya tocandu
las orquestas de murrillus,
bian rivirtíus que tábamus.
De modas, hay que saber
quián ya fema ya quián machu.
La vistimenta ya igual,
de milenas, outru tantu.
Un livitón ya calzonis
de coloris ou de cuadrus
forma pata d´alifanti,
ya ya tamus aviáus;
nun hay más que sexu neutru,
tamus muy semplificáus,
nun distinguis las pareas
mas que pongas ispijualus.
Las que llevan minisaya
puanin birmudas debaxu,
que son unus calzunillus
con puntillas ya bordáus.
Hay otras de mazcaronis,
que son las que puanin “maxis”;
van cubrías de riba abaxu,
co lus pelus po la cara
ya hasta la metá del cuarpu;
soméanti marimantas,
d´estas hay poucas en puablu.
Amás que, pa ver visarmas,
qu´había abondas antañu,
tinía que ser dinuachi,
po´l día tinían recatu.
Las “midis”…, nin fú nin fá,
nun tianin dengún agradu;
las de lus medius vistíus
paécinti currutacus
anque sean bonas mozas:
pìrdiarun el ringu-rangu.
La moda ya la que manda,
ya´l timón llévalu´l diañu.
Toudu lu que fan lus homis,
quiarin ellas caciplallu:
ser menistras, xeneralas,
jefas ya toudus lus cargus,
nun séi si hasta arciprestazgas,
a nada puanin reparu.
Nun is basta con ser misis,
majas, reinas por un añu
con bandas de xeneralis.
Fan tamián lus campionatus
ya touda clas de cuncursus
desdi´ l boxeu hasta el saltu.
¡A ver si van pa la Lluna
ya nus deixan desfogáus!
Visti de cuándu, San Pedru,
que cumiara un ratu a un gatu?
Pos ahora un pescador
que prindiara un peixi al llabiu,
el peixi afogollu, ¿güisti?,
porque s´i metéu pa diantru;
asina puadi dicisi
que´l pescador foi pescáu.
Catalanis ya monsiuris,
belgas ya outrus istrañus,
“La vida del pescador”
en pilícula fixarun.
Desqui el Siñor amanez,
ya impriman el sóu trabayu:
van pa la mar ya rigresan
siguianduis toudus lus pasus.
Tamián Tú, Patrón binditu,
quedas n´ella ritratáu.
Las píndulas ya las drogas
son las plagas d´estus tiampus:
las píndulas, ya si sabi,
son pa que haiga nonatus,
ya pa lu contrairiu hay outras,
que ñacin comu lus gatus,
trillizus ya cuatrillizus,
ya quintillizus a pastu.
Peru lu pior son las drogas,
qu´a la mocedá fan dañu;
chavalinas ya chavalis
quedan comu allucináus.
Lus que trafican con esu
tianin que ser castigáus,
si non tian qu´entervenir
con manu dura San Pablu.
Lu que fai la mocedá
moderna, ya nun da espantu,
peru que tamián las viayas
andin en “escenus” pasus…
Lu que you ví en Lley de Dios,
teneréi que declarallu;
Luis María foi tistigu,
como you, d´esi propasu:
Dos chuchus plantóu n´a cara,
ya a más a un homi casáu,
una viuda de sesenta
que lu garróu dispistáu.
Enteróusi l muyar
y´armóu el primer iscándalu;
l´homi diz que lu borróu,
que nun quedóu nin l´aliantu.
La viuda nun si conforma,
ya quiar que i sean divualtus…
Por dos chuchus de una viaya,
andan ahora plitiandu.
Comu moscas lus toristas
llegan a España cada añu,
ya a Cuideiru tantus autus
vianin, sobri toudu en vranu,
que lus probis rapacinus,
lus qu´en cuachi lus sacamus,
nun puadin salir de casa,
tianin que tar afogáus;
estu ya outru cunflitu
qu´hay que resolvellu lluáu,
faciandu un nuavu camín,
anque sea po lus teáus.
Esti añu ta d´aventuras
Milina la d´Eliséu:
la primeira foi en Luarca,
qu´en puanti diói un maréu;
pa garralla víansi negrus,
tuvu que botasi al sualu,
si non la sacan arrastru
allí si queda d´afeichu.
Dispuás viaxóu a Bruselas
porqui si casaba un ñatu.
Nun pensóu en achantasi,
falóu ya cantóu pixuatu;
siguru nun la intindían,
pero tampocu ella a ellus.
En Francia, ochu pesetas
al pasar p´allá i cobrarun
por un sirviciu… de nada,
que si fai en cualquier campu.
Al golver ya taba alerta
ya negóusi a todu tratu:
detrás de la Torri Infiel,
feixu el sirviciu en sin pagu.
Comu ya puntu emportanti
al fugól hay que mentallu.
Del Marinu nun hay queixa,
que quedóu claseficáu
de venti participantis
el quintu, que ya un bon puastu,
porqui de siampri si dixu
que nun hay un quintu malu.
Pa la outra Temporada
tian que facer gran isfuarzu,
porqui hay cincu más iquipus
discindíus de Tercera
que xugarán con el nuastru
ya, como ya de razón,
han vinir más intrináus
ya ha ser difícil ganallus.
Ahora que si queremus
tener fugól n´esti puablu
ya hay afición de verdá,
haberá que demostrallu
faciandu algún sacrificiu
del bulsillu pa ayudallus.
Una pitición faemus,
lu primeiru al Yuntamiantu,
Cofradía Pescadoris
ya lus más binificiáus
que son comercius ya baris,
qu´el fugól trai muvimiantu
ya emportancia n´estus tiampus.
Dispuás d´unus cuantus añus,
gualvi el Xixón al sóu puastu
de Primeira Devisión
po la puarta grandi entrandu.
Asperamus que lu faiga
en el que vian el Uviadu,
peru tian que ricordar
que pa xugar con aciartu,
nun basta con ivitar
lus golis del outru bandu,
que tian que metellus él,
y´asina faerá bon xuagu.
La Cumisión d´esti añu
ya un tridu bian acopláu:
El prisidenti, San Xuan,
que prisidi desdi´l Cialu,
por nun atopar dengunu
que quera aquí ser nombráu.
Lus outrus dos son, Morán,
el fíu, l´outru Santiagu,
ya bian puadu asigurati
que cada un val por cuatru.
Tati tranquilu, Patrón,
que ta toudu bian tramáu.
Las misas ya prusicionis,
lus sermonis ya lus cantus,
ya ti darías guay cuanta,
todu ha ser del Tóu agradu.
Esu, tocanti a la Ilesia.
Rispitivi a lu profanu,
ya ta dada la lluz verdi,
pa bellar no haberá ispaciu;
faceranlu a lu modernu,
dandu saltinus ya saltus…
Orquestas de las mijoris,
una nunca la guyamus:
“Lus Estelaris”, siguru
dibiarun baxar del cialu.
La outra ya “La Flurida”,
a esa ya bian la apriciamus,
nombri aquí de bon ricuardu
que n´a Cunquista tuviarun
naus ya marinus nuastrus.
¿Nun ti das cuanta, Patrón,
(nun séi si serán lus viantus)
que lus bonus filarmónicus
han ser siampri lus gallegus.
Hasta vianin d´esi rumbu
“Lus Penácarus” gaiterus;
ya co la banda de Pravia,
ta´l cirriburri completu.
Cuideiru ardi n´un candil
con tantu rillucimiantu,
paez que pa illuminanus
abaxarun lus llucerus.
Ya séi, San Pedru binditu,
que ichas de menus algu;
lus nuastrus bailis antigus:
Xiraldillas, Perlindangu,
ya, sobri toudu, las danzas
que ti facían d´agasaju
las viayas ya las rapazas
día ya nuachi danzandu
con aquél pasín minudu
que daba gloria mirallu,
ya con aquél resalseu
que daban a lus refaxus.
Peru, mióu Santu, nun quiarin,
que dicin que tá antiguáu.
¡Quian riniaga de lu suyu
tian poucu cunucimiantu!
Outrus puablus son más llistus
ya sabín bian conservallu.
Quiaru nonceati outru númeru
anque nun tea pogramáu:
A las tres de la mañana
(priparaivus pa iscuchallu),
vei cantar la “Guandulina”
co la sou guitarra, Lalu.
Vou brindar a San Pidrín
po lus tilivisionarius,
la Prensa, l´apuntador,
lus qu´amuran ya´l arradiu,
qu´al Patrón vianin honrar
ya tamián tan trabayandu.
Ya mi dispidu, San Pedru,
pidiánduti el Tóu amparu
en´a tiarra ya en´a mar,
la paz ya salú tengamus;
que las costeras sean bonas,
ya dengunu quedi faltu.
Ya nun lu tomis a mal
si, co la alligría en cuarpu,
algunu piardi´l quilibru,
son balancéus del barcu,
ya comu toudus cunvidan,
nun puadi unu desairallus.
¡Que viva San Pedru Hermosu,
ya vival´l siñor San Pablu!
¡Ya que viva San Pablín
qu´el probi nun tá apuntáu!
¡Que vivan toudus lus Santus
ya Santas que tan en Cialu!
¡Vivan las Otoridadis,
ya que vivan lus mandáus!
¡Vivan tamián lus osentis,
que son pixuatus cercanus!
¡Por toudus lus que brindéi,
que vivan milenta añus!
¡Ya viva la nuastra copla
que ya´l emblema del puablu!:
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA
CON TODOS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!