En el nombri de Jesús
y la Virgin Soberana,
vou ichar l’amuravela
comu San Pedru asperaba.
Aquí tamus outra vez,
Apostul ya Patrón Santu,
en fiastas ya ribulliciu….
tamián un añu más viayus,
n’esu, nun hay diferiencia,
ni na tiarra, ni n’el cialu,
qu’el tiampu nun pasa’n baldri
ya lus añus van sumandu,
anque tou viandu qu’en ti
¿paemi nun van pasandu?
¿fairiasti un “liftin” d’esus
comu’n artista de tiatru?
era lu que ti faía falta…
a la tu edá, prisumiandu.
¿Teneras pur hí, Patrón,
al compañeru San Pablu?
pegai una voz si puadis
ya que si senti al tou llau,
asina aprovechu’l saldu
ya vou a filicitallu
qu’anqui ya’l santu mañana,
nun ta mal un adelantu.
A San Pablín, Santu Hermosu
nun ti destis en buscayu,
que mi paicio vellu anuachi
en’a verbena bellandu,
asina que de siguru
anda pirdiu po’l puablu.
¿ya tas priparau Patrón?
¿tas con el turullu puastu?
¡entos si mi das la venia
vou imprimar co’l rilatu!
que la xanti quiar güir
lus socesus que tuviamus,
ya en especial Tú, San Pedru,
que ya a quian lu didicamus.
En’us asuntus la mar
abondu aliaus tuviamus,
en frebeiru, hasta una gualga
xeneral de esas fixámus,
pa que “lus bolus”, Patrón,
nu nus lus sigan tocandu,
pos ya una mala arti
que nus vianin aplicandu,
esus que si fan llamar
lus nuastrus primus hermanus,
¿con pariantis comu estus,
pa que queremus al diañu?
El nuastru Patrón Mayor
siampri tuvu en primer planu,
ya foi tamián a Madri
con patronis d’outrus puartus,
a ver al Siñor Menistu
o a esi que tian por debaxu,
pa rilatai las pinurias
que aquí tábamus pasandu,
ya truxárun la promesa
qu’iban a sulucionallu;
por esti mutivu ¿guais?
hubu dos que dimitiarun,
peru diarun marcha atrás
ya nada nus ixplicarun,
pa m’idea qu’en una “braña”
quedo el secretu “guardadu”.
De momentu, paicia
taba’l asuntu calmau,
hasta que’n mayu’n Madrí
votarun lus deputaus,
ya aú dician que pruhibian
ahora dicin ¡tá vedau!
Comu nun lu arreglin prontu
ya quedi sulucionau,
vei d’ir p’allá don José
ya entoncis tá el liu armau,
pos ya capaz de deixais
hasta’l Congresu pechau.
Tamián hubu cirriburri
co lus morus de Marruacus,
que pa deixánus pescar
pidinnus a cambiu cuartus,
esu que Hasam dicía
qu’era hermanu del Rey nuastru,
¿nun siria qu’eran primus
ya’l primu tamus faciandu?
has falar Tú con Alá,
por si nus sirvi de algu.
Tuviamus en contra nuastra
hasta a lus homis del tiampu,
pos de sitiambri pa ca
viantus ya aguas nun faltarun,
menus mal qu’en premavera
la mijuria notamus,
fallóu la mirluza’l pinchu,
de palangri, algu salvamus,
si ti paez….. del bisugu
nin tan siquiara falamus,
la costera de bunitu
imprimóu antis de tiampu
ya nun si portóu tan mal,
ni en cantidá ni en tamañu,
lus precius, ya outru cantar
pa nusoutrus siampri baxus.
Asina que comu ves,
nun foi muy allegri’l añu,
entre gualgas, pouca pesca,
ya’l tiampu que tuvu malu,
nun llevantamus cabeza
ni en iviarnu ni n’el vranu,
hay días que ti da nouxu
golver de gualta p’al puartu.
Las fiastas que ti fixímus,
San Pedru, el pasau añu,
piansu fuarun las pioris
que de magar ricordamus,
las orquestas del montón,
lus neñus sin nengun xuau,
ya n’el día del santu tou
nin siquara hubu fuaus,
¡nun m’istraña que lluviara!
¡siguru foi el tu enfadu!
Fai falta que si dicidan
algunas xantis del puablu,
a faer una cumisión
comu las qu’habia antañu,
que urganizaban las fiastas
con diñeiru ya con tiampu,
ya tamián hay que dicillu,
destándusi trabayando,
pos todu esu ya poucu
pa celebrar el tou santu,
que lu que fas por Cuidieru….
¿con que vamus a pagallu?
Siguimus Patrón del alma,
co las obra en el puablu,
qu’el Alcaldi garrou gustu
ya nun para aburacandu,
¿ponerannus d’esta’l metru?
¿o siguimus asperandu?
anqui de siampri tuviamus
aquí un Metru estalau,
tian la estación ahí n’el Sabli,
ya vendi pescau a diariu.
Amás, ¡yo nun mi lu isplicu!
¡nun sei lu que tan faciandu!
pos de bonas a primeiras
todu si vei disfaciandu,
primeiru hundisi La Plaza,
el Contornu esgorromblau,
¿taran firmi El Tolombreu,
La Garita, Casa’l Fuau……?
¿o habera que pidir perras
pa poder apuntalallus?
Menus mal que tas Tu ahí
p’aguantanus lus cimiantus,
anque tan lus del tou barcu
que si andan tambaliandu
ya’l Santu Padri el probi,
vei a quedar sin aliantu
pos el timón pa m’idea
algunu i lu ta turciandu,
qu’algún menistru de Dios,
nun sigui’l rumbu adecuau,
peru lus que sabin, dicin
qu’esus son casus aislaus.
Ahora priguntumi yo,
con tou lu que tan faciandu,
obras pur riba ya baxu
ya con millonis a ciantus,
¿nun habiría manera
de facer playa p’al puablu?
¿güi qu’habia proyeutu
ya faltaba licitallu?
¿o sera que lu soñei
ya tou tuvía durmiandu?
Vou plizcami San Pidrín
pa cuntinuar co’l rilatu.
El Principi Don Filipi
paezmi mordeu’l anzualu
ya piansu you qu’esta vez
nun vei a poder soltallu,
asina que Don Xuan Carlus
puadi ir pensandu en casallu,
anque andin lus monarquicus
pa m’idea algu ciscaus,
¿nun sera que lu que tan
ya un pocu muchu antiguaus?
la moza y’abondu guapa
ya de tipu…. nun digamus,
¡todus la pudimus ver
de modelu disfilandu!
y’amas lus fius que tengan
nunca han de ponesi malus,
pos tras el nomi, han llevar
de apillidu Borbón Sanu.
Todus lus añus Patrón
sal algún farmacu nuavu,
esta vez, pa las muyaris
yá pa quianis lu enventarun,
pildura del día dispuás,
(pa’l nombri bian discurriarun)
ya quiarin que las recetin
pa que sea mas baratu,
estu pensarunlu bian,
porqui si nun lu fan lluau
a alguna parea ¿guais?
salis el “asuntu” caru,
pos tianin que tomar dos
pa sulucionar el casu,
una p’antis d’imprimar,
que ya’l viagra pa’l paisanu
ya la outra pa la muyar
pa desfacer el intuartu.
Estu vian a ser lu mesmu
que la receta Arguiñanu:
la sopa pa calentar
ya’l café pa nu enfrianus.
El día siati d’Utubri,
con devoción celebramus
la fiasta de La Naval
que ya nus vian desd’antañu
ya gracias a lus cofradis
vámusla ricuperandu,
participarun tamian
(paez si feixu’l milagru)
Avanti ya’l Coru Mixtu,
co las gueitas ya lus cantus
¿que musquitu is picaría
que si punxárun d’acuardu?
la fiasta tuvu muy bian
con prusición desde’l puartu
acompañandu a la Virgin
ya rezandui el rosariu.
En nuviambri, la pidemia
de vacas lloucas tuviamus
ya’l igual que la outra vez
lus inguilis la imprimarun,
¡comu aquí nun somus menus!
tamian hubu algunus casus,
ya’l Menistru Agricultura
pa que nun nus alarmaramus,
fartucousi a chuletonis
ya comeulus en sin dualu,
la Menistra Sanidá
tamián salíu al pasu,
pa dicimus qu’al cuciu
icharamus outrus guasus
ya que habia que ulvisasi
de comer el espinazu.
¡Pa que veas San Pidrín,
comu trabaya’l Gubiarnu!
¡A ver lu que fan agora
co la pesti de marranus!
Llegóunus la Navidá
y’al turrón pa festejallu,
en aguna casa ¿guais?
quedo el “tabiqui” temblandu,
siguimus co’l “arbulín”
ya sin llucis allumandu.
El Nacimiantu la Ilesia
cada añu ta más guapu,
que abondu si desta Vitor
trabayandu en sin descansu;
una noria con un burru
que taban en muvimiantu
ya lus pegollus d’un horru
tamian taban adornandu.
Hubu tiatru tamian
de lus niñinus del puablu
ya fixárunlu tan bian,
que quirian cuntratallus
¡paemi que a Holivu!
era aú quirian llevallus,
peru comu ta tan llonxi
lus sos pas nun lus deixarun.
Muy poca xanti, pur ciartu,
hubu n’a misa del gallu,
más bian paicia de pitu,
¡nun habia ni pa un caldu!
El día la cabalgata
caeu agua del cialu,
peru con esu ya todu
lus Reis d’Urianti viniarun
¿pensarian era confeti
que is tabamus botandu?
Cuatru carrozas bian guapas,
lus iban acompañandu,
una llena d’anxilinus,
que daba gustu mirallus,
falarun a lus niñinus
comu siampri fan lus Magus
ya estus intusiasmaus
bonus aplausus is diarun
ya dispuás pa dispidillus,
d’artificiu hubu fuaus.
Un gran acunticimiantu
n’el mes de Marzu tuviamus
que la Patrona d’Asturias
venu de vesita’l puablu,
misas, cantus ya rosarius
¡comu pudimus la honramus!
y’hasta una Amuravela
pa dispidilla l’ichamus,
asina, enterousi bian
y’amás de primeira manu
pos la última vez que venu
facia cincuanta añus,
ya pa m’idea ¿güisti?
hasta entendeu’l pixuatu,
¡comu si anota San Pedru,
que tian en Ti un bon maestru!
La Semana Santa, venu
isti añu con bon tiampu
ya de touristas, Patrón,
iba un xintiu disiartu.
¿Qué ti pasóu co las lárimas?
¿secabatilas el viantu?
que n’a parada de taxis,
disti la gualta pa baxu
o siría que las muyaris
que ti iban portiandu,
cansarunsi de llevati
porque las tabas mollandu,
pa outru añu, has de pidili
a San Xuanin el pañualu.
El Calvariu, algu floxu
la nuachi del Xuavis Santu
ya el viarnis, ricupirousi
outra vez el Desenclavo
ya’l Padri Mingu, subiu
al pulpitu, pa tar altu
ya pidricanus asina
como si facia antañu.
Dispuás con gran devoción,
saliu el Santu Intiarru
ya a meta de prusición,
feixu San Xuanín un altu
ya de repenti ¿güisti?
co’l dedu apunto pal sualu
¡pa m’idea que de las obras
quiría dicinus algu!
peru comu nun falou,
tampoucu i fiximus casu.
Las Venias, bian, comu siampri
na nuachi’l Sabadu Santu.
Mayu nun si portou bian
y’hasta imprimou envernandu,
en el Pitu, po las fiastas
que dicin del Artesanu
ya fan el día primeru,
pa calecesi, punxárun
hasta una calefación
¡nu avasto al calor humanu!
peru esu nu is da más
¡tianin el gasol baratu.!
Pa m’idea que San José
esta vez meteu la manu,
¡siguru que nun i gusta
que i cambin de día el santu!
pos siampri celebróu esti
el diacinuavi de marzu,
¡ Si si enteran en Valencia….
en una falla han quemallus!
¡yo acuardumi de llevar
lus franxualus ya lus guavus!
¡lus cucius! ya m’entendis,
qu’estu cumbian aclarallu.
Mira ver, Patrón del alma
si Tú puadis ayudanus,
ya fas que n’a carretera
nun tengamus tantus muartus,
pos del Pitu a Nuvillana
ya lus cuntamus a ciantus,
teneras que dai un toqui
al Siñor Alvarez Cascus,
pa que faiga ceu las obras
ya que nun liciti tantu,
fainnus falta autuvias,
en Cuideiru, el macru puartu,
la varianti del Pajaris,
el AVI …. u outru páxaru,
ya vou dicillu outra vez
¡una playa pa esti puablu!
si non el Plan d’Excelencia
paemi queda un poucu tuartu.
Siguimus tandu tan lloucus
o más qu’el pasau añu,
gualgas, guerras ya guirrillas,
sisinatus, atentaus,
lus traficantis de drogas
ya niñinus maltrataus,
lus judius ya lus morus
siguin tamián aliaus,
y’hasta lus maestrus ¿güais?
mi tianin disconcertau,
entre publica o privada
ta’l cirriburri amontau,
miantras tantu, lus gubiarnus
siguin de brazus cruzaus
¡con ir cierrándulu todu,
piansan ta sulucionau!
ya lus únicus que abrin,
lus grandis supermercaus.
Cumisionis baxu manga,
terrenus calificaus,
ya’l carbón de la Camocha
nun si sabi aú foi picau,
(paez que la currución
ya algu muy arraigau)
lus precius tan po las nubis,
el euru baxa embalau,
la inflación nu hay quian la pari
¡ta todu descontrolau!
Hasta’l Alcaldi de Pravia,
paez anda algu ciscau,
quiar llevanus el altar,
que n’el Pitu custudiamus
desdi tiampu inmemorial
ya gracias a Fortunatu
dexóu de ser barra un bar.
Güi dicir a lus viayus,
qu’el diañu pa entretenesi
mataba moscas co’l rabu,
pa m’idea que lu mijor
ya que nu i faigamus casu.
Asina que ven p’aca
¿tan mal ti paez nus portamus?
¿qué pecau tan grandi foi
que nusoutrus cumitiamus?
¡nun abastan las pinurias
que n’el mundu tan pasandu!
¡que tenemus qu’aguantar
a la Tamara cantandu!
Ya por si estu fuara poucu,
golveu el Gran Hermanu,
esta vez con una pita,
¡nun paran cumiandu guavus!
más de unu vei cabar,
co n’el colesterol altu.
¿Visti San Pedru del alma,
lus inguilis la qu’armarun,
co la cara del Siñor
que nus papelis punxárun?
¿fijastiti’l paiciu?
¡ya igual qu’el Alcaldi nuastru!
güi que lus concejalis,
andan con ripiru’n cuarpu,
porque Quicu, ya capaz,
pa dai más rialismu al casu,
faer lus plenus en Santana
por ser alli llugar santu
ya comu amás son doci,
tianin el liu amontau,
que nadi quiar faer de Judas
ya dispuás tar siñalau.
El sábadu dos de juniu,
¡minuda fiasta tuviamus!
porqui taban en Cuideiru
la mina y la mar xuntaus,
lus d’Avanti, San Pidrín,
muchu bian l’urganizarun,
con esti ya van diaz añus
que lu vianin cilibrandu,
hubu cuncursus, descursus
ya un menumentu bian guapu,
qu’en sin falta poner lentis
puadis tu mesmu mirallu
yá una mina de carbón,
con un ancla ya unus cabus
¡y’hasta hay una vagoneta
pa meter a Sergiu diantru!
Dispuás, cunciartu na Ilesia
con tres corus afamaus
de la cuanca del Caudal,
outru cuartu era del puablu
y’anque eran primirizus,
cantarun comu avezáus,
la xanti pasóulu bian
ya munchu lus aplaudiarun.
Acoi San Pedru cuntigu
a lus cunucius muartus,
pixuatus u adotaus,
que son todus fius del puablu.
Vou a nomati a dos de ellus
qu’esti añu nus deixárun,
en eneru, dispidimus
al artista Pepi Candanu,
atoparaslu pur í
con el caballeti puastu,
Guillermu’l aparejador
dexóunus n’el mes de mayu,
esti si quias, Santu Hermosu,
puadi urbanizati’l Cialu.
Ya vou tirminar Patrón,
que la xanti t’apurandu
ya lus de la pirutenia,
quiarin ya prendeis fuau
a la parea xigantis,
pa llenar de fumu’l puablu.
Vou a piditi primeru
que nus ichis una manu,
nun nus deixis, San Pidrín,
pos abondu en ti isficiamus,
fai que tengamus salú,
y’anqui sea con trabayu
que gualva el peix a Cuideiru
comu habia’n outrus tiampus.
Has mandai cuartus pa Firiu
que hubu que remolcallu,
pos debeu gastallus todus,
por Castellón viraniandu,
o si non, bona memoria,
pa ricordai qu’el gasol
tamián hay que rellenalu.
Al Uviadu ya’l Sporting
tianis qu’ichais una manu,
llevalus pa’l purgatoriu
¡sácalus lluau del infiarnu!
o por lu menus, precura
que nun baxin más abaxu,
porqui si non van cabar,
xugandu contra’l Pixuatu,
ya lus mandamasis ¿guais?
pudirían ir pensandu,
que igual siría mijor,
faer un mediu de dos cuartus.
Ahora vou co lus vivas,
que ya lus tas asperandu,
ya tuvia con más ganas,
estus que tan aquí abaxu.
¡Viva San Pedru Gloriosu
apostul ya patrón nuasu!
¡Viva tamián San Pablín
ya viva Pablu de Tarsu!
Santana ya San Juaquin,
San Roqui, el perru ya’l rabu
Un viva pa San Jacobu
ya p’al fileti empanau,
¡Vivan las otoridadis
ya lus sos subordinaus!
Un viva pa’l Coru Mixtu
ya outru pa’l coru paisanus.
pa Titu’l que fue al ispaciu
ya pa Titi el municacu
que tian pouca diferencia
con el nurtiamericanu.
¡Vivan todus lus touristas
que vianin a vesitanus!
Ya outru viva muy sintiu
pa lus nuastrus mijicanus,
¡Viva la Banda de gueitas
ya que risuanin bian altu!
Que vou ricitar la copla
que distingui a lus pixuatus:
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA,
CON TODUS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!