En el nombri de Jesús
y la Virgin Soberana,
vou ichar L’Amuravela
comu San Pedru asperaba.
Filiz día tengas, Patrón
ya por altu has cilibrallu,
comu tamián en Cuideiru
lu facemus lus pixuatus,
xuntándunus na Ribera
alredor todus del barcu,
pa cuntati comu siampri
lus socedius del añu,
cumpliandu co’l riquisitu
que de magar de lus tiampus,
asina lu istipularan
lus nuasus antipasaus,
ya pa más inri tamián
que lu fixara un pixuatu
(cuandu foi un aldianu
ya visti el desaguisau)
o pixuata que igual da,
tantu monta, monta tantu,
lu de “pixuate” nun sei
si aquí viniría al casu.
Comu pa m’idea tampoucu,
tar a cuncursu sacandu
el textu l’amuravela
pa ricitar cada añu,
una idea piligrina
qu’algunus tan comentandu,
isu ya disconocer
las tradicionis del puablu,
¡yá propiu de talibanis!
que todu van istrozandu,
unus en nombri de Alá
ya outrus porqui tan de fualgu.
Si quiarin subir aquí
yo desiguida mi baxu,
qu’istu nun ya en propiedá
nin cobru nada po’l cargu.
De momentu vou siguir
filicitandu a San Pablu,
qu’ anqui ya’l sou Santu guay
mañana lu cilibramus,
-in istu d’allargar fiastas,
de siampri fuamus lus amus-
ya si nón ¿por qué pensais
que a San Pablín enventamus?
isi día menus la misa,
el restu tou ya profanu,
vamus a la prusición
en sin llevar nengún santu,
dispuás tianis el bautizu
que si fai na Fonti’l Cantu,
con Sergiu ‘l Franxón de cura
ya lus d’Avanti tocandu,
pa tirminar con el bollu
ya bellandu el Pirlindangu.
Isu si nus lu pirmiti
el covid isi del diañu,
que nus tian mitíus en casa
con el ripiru n’el cuarpu,
a ver si co las vacunas
nus vamus nurmalizandu
ya golvemus tar comu antis
del pasau añu por marzu.
A istu llámanlu, Patrón,
la imunidá de rebañu,
acertarun con el nomi,
que asína nus comportamus,
en cuantu nus deixan llibris
a salir en sin horarius,
¿peru qué i vamus faer?
si lus que tianin el mandu
ya lus que quiarin garrallu,
ni en asuntus comu isti
puadin ponesi d’acuardu,
todu son enfrentamiantus
comu de magar nun viamus
ya gulviandu a dividinus
outra vez en lus dos bandus,
la hestoria tá ahí, San Pedru,
asperu nun ripitamus.
De la mar ¿qué vou diciti
que nun sepas Patrón Santu?
tamus cada vez pior,
¡comu el chanquili avanzamus!
La costera de bunitu,
que bian ceu la imprimamus,
taba dándusinus bian
hasta que ‘l cupu cabamus,
comu istu socedeu
bastanti antis de tiampu,
lus franchutis ya outrus más
pudiarun siguir pescandu
ya nusoutrus miantras tantu
amarraus ya nel paru.
Comu siampri la mirluza
ya la que nus vian salvandu,
que tián fama la del pinchu
desde tirrimotus tiampus.
Algu de pulpu, porcebis,
saramolletis ya xargus,
roballizas ya centollus,
valiárunnus pa ir tirandu.
Lu pior ya que pa todu
nus quiarin tar vigilandu,
¡hasta cámaras de vidriu
quiarin poner enus barcus
pa grabar lu que facemus
miantras tamus trabayandu!
¿Pensarán somus ladronis,
o tamus istraperlandu?
La caballa, ista vez,
nun venu comu asperabamus,
asina que algunus botis
desiguida lu deixarun,
pa didicasi a outras cousas
ya poder siguir cumiandu.
Que pa beber bian que abrin
baris nuavus en el puablu,
unus porqui tan d’istrena
ya outros por cambear de duañu,
vou nomátilus Patrón,
por si quiás tomar un vasu:
Imprimas en el Veleru,
La Casina, El Buzu Viayu,
bar tianda La Gijonesa,
el de Dimas más abaxu
ya en sin moveti del sitiu
ta ‘l Deleo apegau,
(en ver de mesas, siguru
puannus “messis” pa sentanus)
¡si i punxaran Dimaría
iba menus cumplicau!
ya ‘l de La Rula quedóu
abondu bian riformau.
Tamián nus baris d’arriba
algunus cambius fixárun,
punxarun bonas tirrazas
pa que teamus aparcaus.
Ena Plaza la Marina
ta todu más ordenau,
gualvin tar lus pasus llibris
pur u taban siñalaus,
asperu sea de dura
pos en cuantu llega ´l vranu
el tourista ya el que manda
ya fai lu que quiar n’el puablu,
¡l’outru añu desagerau
iba un xintíu disiartu!,
que vengan, ta bian Patrón,
que asina déxannus cuartus,
peru que si urganicin
ya que lu faigan por tramus
¡non todus de sopetón
que ya nun damus abastu!
Foi comu la envasión
que lus franchutis fixárun,
pa vinir hasta Madrí
en mediu ‘l cunfinamiantu,
que sigún dicía Ayusu
vinían a ver lus cuadrus
que tianin enus museus,
in ispicial lus del Pradu
“Lus Borrachus” de Velázquez
foi el que más vesitarun.
Aquí viniarun algunus,
pa m’idea dispistaus,
pa ver un cuadru de Goya
ya outru po’l Grecu pintaus,
que na Quinta de lus Selgas
dicían taban colgaus
ya is dixímus nun buscaran
nin pirdiaran más el tiampu,
Anibal foi pa Madrí
ya la Inmaculada…al cialu.
¡Si lus Selgas llevantaran
la cabeza, Patrón Santu!
algunu na Fundación
tinía que salir curriandu.
Dati gustu güir agora
el relós del Yuntamiantu,
al dar las horas en puntu
apitezti tar bellandu,
con la Red po la mañana,
po la nuachi el Pirlindangu,
isti ya más seliquín
pa poder garrar el suañu,
sin embargu las aguyas
pirdiarun el muvimiantu,
tan en las tres menus venti
paradas desdi fai tiampu.
El mirador la Garita
pur fín ya lu ripararun,
bona falta li facía
comu ti dixi l’outru añu,
asina puadi subisi
sin piligru al descalabru
ya desfrutar de las vistas
desde lu altu del puablu,
lu mesmu pasóu co’l túnil
que baxa hasta ‘l puartu nuavu,
qu’esflechara mediu monti
ya taba cierrau el pasu,
agora ya puadi usasi
pa subir ya tar baxandu.
Tamián al llau la playina
punxarun un parqui nuavu,
pa que xuguin lus niñinus
miantras nus tamus bañandu.
Aú nun ti puadis sentar
pos isgorromblóu el sualu
ya nus bancus de coloris
que l’outru añu istrinamus,
¡bian poucu duróu la obra!
¿fallarían lus cimiantus?
¿Ya qué upinas del lletreru
al oesti’l puartu viayu?
paez ta “buscandu a Waly”
por el faru que i punxárun,
al de Peña Roballera,
ya sabis, el faru nuasu,
que nun li faigan lu mesmu
cuandu toqui riformallu.
¿ya la única direción
que nus punxárun po’l vranu?
you sufrí viandu a Angilín
co la carritilla en manu,
carretandu co la carni
mualli arriba, mualli abaxu,
teu que riconocer
qu’agora hay menus atascus,
peru pa casus concretus
pudían llevantar la manu.
Isti añu, San Pidrín,
muchas “nun fiastas” tuviamus,
imprimandu po la tua
que si cabóu suspindiandu,
salvousi L’Amuravela
que na Ilesia cilibramus,
asina comu las misas,
¡foi todu lu que llogramus!.
Po las mesmas cercustancias
a Montarés nun subiamus,
Santa Ana ya San Juaquín
que nus sigan asperandu
ya si nus deixan subir
si Dios quiar pa isti añu,
ha ser tan gorda la cousa
qu’hemus de baxar rodandu.
De l’Amuravela d’Ouru
lus premius nun s’intrigarun,
siguru n’esta idición
por duplicau han de dallus,
las habaneras tampoucu
lus del Coru urganizarun,
ya en Simana Santa, nada,
nin bindición de lus ramus,
nin Calvariu, nin las Venias
ya tampoucu el Santu Intiarru.
En Navidá algún adornu
ya las llucis allumandu,
nun hubu la cabalgata,
peru lus Reis, si viniarun,
sentaus n’el Palación
debaxu del Yuntamiantu,
paicía taban contentus
ricibiandu al rifugallu.
Outrus reis, tianin que isi,
comu i pasóu a Xuan Carlus,
por andar faciandu trampas
ya nun pagar lus impuastus,
pa facer honor al nomi
ya po’l sou cumpurtamiantu
nus Imiratus del Golfu
paemi que ta viviandu.
A lo sou ñata Liunor,
Princesa nuasa, pur ciartu,
van a mandala pa Galis
a faer el bachilleratu,
ya dixarun lus sos pas
que del sou bolsu han pagallu,
que pa isu sal el diñeiru
de lus pirsupuastus nuasus.
El tiampu n’ista ucasión
andubu algu rivirau,
¡ya nun sabis que poneti!
pos ta to’l día cambeandu
¡comu fai Tony Cantó!
sigún comu i sopli el viantu
vei cambeandu de partiu
pa poder siguir cumiandu,
lus páxarus de calor
cain a metá del iviarnu
ya n’el vranu, con abrigu
salimus a pasianus,
istu ya dibíu todu
a isu del cambiu climáticu
po lu qu’el globu tirráquiu
sufri de calentamiantu,
comu nun tomin mididas
pa cunsiguir infriallu,
vei a lleganus el día
que ha de cabar isplotandu,
ahí tianis las ciclugénesis
ya borrascas que viniarun,
amás, San Pedru, paicían
que todas iban del puablu,
La Bella venu primeiru
con folas ya abondu viantu,
siguíula Filomena
¡istu iba Riguera abaxu!
con muchu fríu, con niavi
con aislamiantus ya atascus,
más tardi llegóu Hortensia
ya Inaciu pa rimatallu,
de helaus, istus dos sabían,
dígutilu you, ¡un ciantu!
En Granada un tarremotu
tamián feixu algu de dañu,
hasta curenta tembloris
en una nuachi cuntarun,
outru tarremotu bonu
armóulu Ayusu en mayu
que feixu temblar Madrí
co lus votus que li diarun,
Podemus quedó en pudimus
ya borróu a Ciudadanus,
hasta Pedru Sánchiz ¿guais?
quedóu con ripiru en cuarpu;
que andi con cuidau agora
cuandu tea gobernandu,
que la llibertá nun yá
tar de fiasta ya bellandu,
o nun atopati al ex
cuandu teas pasiandu.
Enus Estaus Unius
tuviarun cambeus n’el mandu,
icharun a Donald Trump
en el nuviambri pasau,
anque ‘l nun taba cunformi,
dicía que lu enfuyarun,
quiriandu anular lus votus
que por correu llegarun,
hubu manifestacionis
ya’l Capitoliu asaltarun,
peru nu i sirvíu de nada,
al final cabóu marchandu
comu si van lus que piardin,
gachandu oreas ya rabu;
agora Biden ya Kamala
son lus que tan gobernandu,
ista suanami Patrón
¿nun tinía familia en puablu?
ena Cai, había una tianda
de los sos antepasaus.
¡Acamiántati, Patrón!
cortóu la coleta Pablu,
amás en tous lus sintius
n’el pelu ya n’el gubiarnu,
a lu que vei didicasi
ya nus lu dirá co’l tiampu,
puadi tomallu con calma
quedouli abondu de paru,
igual si pon de niñeru
ya asina afórrasi un cargu.
Al llau del Humilladeru
colocóu el Yuntamiantu,
-con un sintiu homenaxi,
que Amets ya Sara tuviarun-
una placa con sos nomis
ya con el nuastru ricuardu,
pa que casus comu el d’ ellas
nun si sigan ripitiandu,
pos la violencia machista
tenémusla casi a diariu,
anque Santiagu Abascal
tea empeñau en negallu.
Las que xugan al parchís
que ti cuntéi l’outru añu,
comu is cierrarun el Centru
nuavu aposentu toparun,
agora ichan las mañanas
de café ya virmutiandu,
vansi dispuás a comer,
garran un taxi n’el puablu
ya subin a Casa Lupa
pa siguir dandui al dadu,
¡llevarálas Carulina!
falandulis n’ asturianu,
tian el autu priparau
pa carretar a lus viayus.
Lus que van hasta la verdi
casi a diariu caminandu,
que lu faigan con cuidau
p’asina nun faesi dañu,
pos de un tiampu p’acá
socedin casus istrañus,
salin piadras d’aú nu había
ya esgóriansi contra ‘l sualu,
Conchita, Carmen ya Marisol
habéis andar más dispaciu,
que nun tenemos edá
pa tar rumpiandu lus guasus,
a outrus saltanis las folas
ya van pa casa pingandu,
güi pasoi a Costanti,
qu’iba bian acompañau
por Candi, la so muyar
ya Manulina al costau,
ista pasoulu muy mal
ya amás saliui bian caru,
pos tuvu qu’ir a comprar
de visón abrigu nuavu,
si llevaran pixiglás
taba el poblema risualtu.
San Pedru, has de mirar,
Tú que sos porteru en cialu,
si ti sobra algún llaveru
ya facemusli un rigalu
a Ángel el del Patrón,
pa cuandu tea ripartiandu,
ya asina llevi las llavis
nel bolsu a bon recaudu,
nun li gualva soceder
outra vez el mesmu casu,
que i robarun el furgón
con toda la sidra diantru
ya solu atopóu el sitiu
cuandu golveu del ripartu,
dicían fuaran lus Jimenez,
pa mi fuarun lus Manzanus,
Tú nun ves que ‘l cargamentu
nin siquiara lu tocarun,
al ver que iba de sidra
dixarun.. parianti nuastru
ya por isu apareceu
sin avirías nin dañus.
Ya pal sou pá, un relos
que tamian i lu arrobarun,
anqu’esti ya más difícil
el poder ricuperallu,
pos húbulus que lu viarun
ir por el cialu avolandu.
Tan las gavioutas ciscadas
comu nunca lu tuviarun,
vou cuntati un mareaxi
que a mi tamían mi cuntarun:
Serafín, ya lu conocis,
foi calar al mualli viallu,
dispúas de lanzar la caña
viu que salía avolandu,
pensóu que una roballiza
garrara de bon tamañu
ya cuandu fuarun mirar
xuntu a las peñas del faru,
discubríusi el misteriu,
pos lu que allí si atoparun
nun foi un peix, Patrón Santu,
si non qu’era una gaviouta
que garróu l’anzualu al vualu.
Tan nel Estitutu Selgas
d’aniversariu isti añu,
pos cumpli lus vinticincu
desque lu enegurarun,
deseámusli que siga
po lu menus outrus tantus
ya si podi ser, Patrón,
que podamus cilibrallus.
La nuasa Catedralina
paez la tán riparandu,
que bona falta i facía
metei manu pol teau,
dábati nouxu mirar
l’altar que ta ricibiandu,
co lus calderus colgaus
en ver de tar co lus Santus,
entre ‘l fríu ya humedá
nun ganamus pa catarrus,
¡ni con mascarialla puasta
fuamus quianis a ivitallus!
Güi que l’arzobispau
ponxu ista vez bonus cuartus,
pos Don José siampri tuvu
enas alturas contatus
ya siguru antis de isi
dexóulu todu arreglau,
agora ta discansandu
en Uviadu xubilau,
bian miriciu lu tian
dispuás de cincuanta añus,
que fai poucu lus cumplíu
de párracu aquí nel puablu.
Agora ya Don Antonio
quian lu tá sostituyandu,
has ayudalu, San Pedru,
que tian abondu trabayu,
lleva el probi más pirroquias
que pa m’idea i da el pañu.
Lu de Paquirrín ¿nun haberá
manera de arreglayu?
que si Cantora, p’aquí,
que si so má i debi cuartus,
que ’l capoti del sou pá
era de lus sous hermanus,
que ‘l probi iba inoranti,
qu’al paicer, lu enfuyarun,
pa m’idea todu istu
nun deixa de ser un cuantu
que si enventóu “teli circu”
comu ‘l de Ruciu Carrascu,
pos pa dinunciallu antis
abondu tiampu tuviarun.
Ya comu ‘l coronavirus
que por folas foi viniandu,
hasta anantis las vacunas,
cuatru paemi si cuntarun,
esu qu’el doctor Simón
el añu pasau por marzu
dixara íbamus tener
tan solu dos o tres casus.
Paez que agora, Patrón,
un albanci vei llegandu,
pos a bon rimu a todus
las vacunas tan puniandu,
notasi nus hospitális
ya que amás hay menus muartus.
Isu aquí, San Pedru Hermosu,
nel mundu disarrollau,
que nus paisis más probis
nu hay ni cuatru vacunaus
ya siguin murriandu a milis
con millonis encetaus,
isti asuntu paemi a mi
dibías sulucionallu,
pos sinón la enfermedá
vei a siguir ixistiandu.
Lus fallicíus que hubu
a lu llargu ‘l añu en puablu,
faiti cargu Tú Patrón
¡has atendellus nel Cialu!
que nusoutrus, nun pudimus
dispidillus comu antañu,
pos al tar lus tanatorius
col aforu llimitau,
solu iban lus familiaris
ya amás cuatru cuntaus,
nin siquiara al ciminteriu
fuamus por Todus lus Santus,
pa que nu hubiera cuntagius
mantuviárunlu pechau.
Sin embargu n’Argintina
bon cirriburri amontarun
cuandu morreu Maradona
en nuviambri del pasau,
L’Argintina ya Cuideiru
tamus agora hermanaus,
si allí morreu “el Pelusa”
aquí feíxulu “el Pelau”,
comu porteru que sos
la ganancia nun ti arriandu,
pos van a meteti golis
¡asina que has tar al tantu!
¡Almiranti! cada día
tamus más cerca del cialu,
pos hasta Marti llegóu
un espuni que unviarun,
han llegar antis allí
poner lus pías lus humanus,
que llegui ‘l Avi a Madrí
desde Xixón o de Uviadu,
pa m’idea que nun quiarin
que d’Asturias nus movamus,
pos hasta nas carreteras
peaxi quiarin manganus,
¿nun lis abasta ‘l del Huerna,
que ya sal abondu caru?
lu miyor pa todus era
que lu cabaran quitandu.
Nun t’ixtrañi que la xanti
d’Asturias quera ir marchandu,
pos nu atopan purvinir
ya munchu menus trabayu,
dexarunus sin las minas,
sin industria, sin el campu,
sin ir mas llonxi, Patrón,
¿nun ti abasta ver el puablu?
anantis había barullu
todus lus mesis del añu,
co lus carrus, co lus peixis
ya lus botis en el puartu,
agora solu hay turismu
ya isu na más que po’l vranu,
el restu ‘l tiampu paez
que vivis en un disiartu,
esu si, tamus nel clu
isi de lus puablus guapus.
Siguru que nas alturas
con Mahoma tianis tratu
pa que i diga a Mohamé,
el rey sextu de Marruacus,
que las fronteras nun son
p’abrillas ya tar cierrandu,
dexandu pasar prisonas
que tan mal lu tan pasandu,
miantras él ta ricu podri
ya bian gordu comu ‘n xatu,
nun son Ceuta ya Mililla
pa que las tea invadiandu,
pos pirtinecin a España
desde magar de lus tiampus,
ta vistu que todu yá
pa tar sacandunus cuartus,
¡llibranus d’estus amigus
ya lus que vayan saliandu!
pos de nuastrus enemigus
nusoutrus nus ucupamus,
apruximandu a unus presus
o a outrus indultandu.
Pa poder surdir, Patrón,
has d’ichanus una manu
ya sinón que sean las dos,
¡que bian lu nisicitamus!
prencipal aquí en Cuideiru
co la pesca ya lu nuasu,
pa que omentin las ganancias
ya rigrisemus a puartu,
fai que nus gubiarnin bian
a lus que is dimus el mandu
ya lus que unda nun lu tianin
tengan pacencia asperandu.
El ricibu de la lluz
ayudanus a pagallu
ya mira ver lu que fais
pa que cambiemus el suañu,
pos pa llavar ya planchar
tócanus tar trasnochandu.
Agora voy dispidimi
antis de baxar del barcu,
asperu golver a veti
si Dios quiar diantru d’un añu,
pa cilibrati, Patrón,
outra vez por tou lu altu,
comu antis de la pandemia,
con luju ya con boatu,
misas, orquestas, charangas,
cochis de choqui ya fuaus,
que la Cumisión tian ganas
ya lleva tiampu asperandu.
Vou imprimar co lus vivas
pa ir dandu fin al rilatu,
pos nun cunvian que teamus
aquí xuntus tantu tiampu.
¡Viva San Pedru Binditu!
¡pescador ya Patrón nuasu!
¡Vivan todus lus xintilis
ya ‘l sou apóstul San Pablu!
¡ya que viva San Pablín!
de lus dispistaus el santu,
de todus lus caminantis
¡que viva el siñor Santiagu!
¡Santa Ana ya San Juaquín,
vivan co lus ermitañus!
¡Viva el cura que marchóu
ya que viva ‘l cura nuavu!
¡Que vivan lus sanitarius
que nus tuviarun sanandu!
¡Un viva pa las vacunas
que d’esta nus tan sacandu!
¡Vivan lus que tan aquí!
¡Vivan lus que nun viniarun!
¡Ya viva la nuastra copla,
que al güílla lus pixuatus,
teamus cerca o teamus llonxi
íntranus rispingu en cuarpu!
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA
CON TODUS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!