En el nombri de Jesús
y la Virgin Soberana,
vou ichar l’Amuravela
comu San Pedru asperaba.
¡Filicidadis, Patrón!
¿tuvisti muchus rigalus?
¿nun ti pundrían na tarta
una vela por cada añu?
pos si asoplastilas todas
tarás ahora sin risuallu,
ya tuvía con nusoutrus
ti queda por celebrallu,
igual nus da que sea santu
o que sea cumpliañus,
que pa esu tamus aquí,
las pixuatas, lus pixuatus
ya tamián lus forasterus
que vianin a vesitanus.
Guay pa mí, ya un día ispicial,
pos fai vinticincu añus,
que desdi la popa el boti
ti vengu amuravelandu
ya quinci d’ ìsquirbidor
de lus versus del rilatu,
aú ti ponemus al día
de lus acunticimiantus
qu’ en Cuideiru ya n’ el mundu
vianin a diariu pasandu,
Amás de filicitati
en nomi de todu’l puablu,
a Ti, por ser vos quian sos,
¡nuastru valedor n’el Cialu!
ya por ser el tóu amigu
ixtendémuslu a San Pablu,
que nunca tará de más
por si fai falta una manu,
¡peru sin el espadón!
esi que lu deixi quiatu.
Ya pa completar el tridu,
anque esi nun sea Santu,
filicitamus tamián,
al que tirmina pechandu
lus festejes en tu honor,
a San Pablín mi rifiaru.
Vou imprimar comu siampri
a cuntati lu más nuastru.
Tamus na mar comu’l chánquili,
cada vez más pa tras vamus,
co’l mal tiampu, nun salimus,
si salimus, nun pescamus,
si pescamus, nu hay ganancias,
pos tan lus precius tan baxus,
que si vendi la mirluza
al valor de fai diaz añus,
costanus más la carnada
qu’el prudutu que sacamus,
a esti pasu, valnus más
garrar muilis n’el puartu,
que nun gastamus gasol
ya asina aforramus cuartus.
Tamián co l’angula pasa
de lu mesmu outru tantu,
qu’en risumin quiar dicir,
qu’esti añu nun guliarun,
hubu vecis qu’entri todus
ni un kilugramu garramus,
peru estu, non en un día,
a todu un mes mi rifiaru.
Con estas trazas, Patrón,
dos cousas nus sucidiarun:
nun viniarun japonesis,
ya baxóu el preciu’l aju.
Vou cuntati, Santu Hermosu
de un plan nuavu aú nus mitiarun,
pa que la mirluza’l pinchu
tenga ricunucimiantu,
ya sepan desde la Rula
a diariu las que garramus,
comu ya de que manera,
si po’l cogoti o po’l rabu,
asperemus qu’el sistema
nun allegui a tener fallus
pos temumi lu pior…..
¡un pulicía en cada barcu!
el nomi nun ti lu digu
pos isquirbisi muy raru,
pa m’idea que ta n’inguili
nun sou quian a prununciallu,
el tiampu ya nus dirá
si nun val o val pa algu.
En’a Direción de Pesca,
un nuavu cambiu tuviamus,
llevamus tres mandamasis
en apoucas más d’un añu,
n’el Madrí lus prisidentis
duraban algu más tiampu.
Asina que mira ver,
s’isti tirmina el mandatu,
pos paez un rapaz llistu,
en sin un pelu de “fatu”
amás conoz bian la mar
que ya ñaciu en Luancu.
Co las gavioutas paez
que tamus más rilajaus,
nun tuviamus cirriburris
comu hubu el añu pasau,
vou cuntati el mareaxi
pa que Tú tes enterau:
La Cumisión de festejus,
pa ir atotandu lus cuartus
tan vindiandu lutiría
duranti toudu el vranu,
ya puanin lus altas-vocis
alta la lleva asonandu,
con pasus-doblis, rancheras
ya curridus mijicanus,
estu paez que a las gavioutas
nun is debi tar gustandu,
pos tapandu las oreas
marchansi todas glayandu;
pa m’idea qu’esti enventu
tinian que patentallu,
vindían por outrus lláus
ya nusoutrus descansamus.
Comu ti dicía anantis
nun acompañou el tiampu,
sobri todu en eneru
con muchu friu ya viantu,
hubu folas, San Pidrín,
de venti metrus de altu
peru in ista ucasión
pasarun llonxi del puablu,
asina que nun tuviamus
que lamentar dengún dañu.
La premavera, tampoucu
venu comu la quixáramus,
pos tan prontu taba bonu
comu si punía d’ iviarnu,
así tuviamus arrastras
sin apear el catarru,
ya cuando ya paicía
qu’ ibamus amijorandu,
llegounus la gripi’l gochu
que de Méjicu truxarun.
En el “gatu Filiciana”
primeramenti pensamus,
pos igual taba de gualta
ya pudía cuntagianus,
peru dixarun que non,
qu’era gatu non marranu,
ya qu’el piligru aú taba
era entre lus humanus.
Con todas estas lus rusus
quixarun boicoteanus,
primeiru con el xamón
que nun quirían importallu,
más tardi co lus touristas
pruhibiándulis vesitanus,
ya dispuás n’Uruvisión,
que pinúltimus quedamus.
Lu primeiru arreglousi
lu de Soraya non tantu.
En Sitiambri La Santina
aflotóu de nuavu’n puartu,
ya lus buzus, comu siampri
en prusición la llevarun
pa rezai la Santa Misa,
entre cánticus ya aplausus.
Tuvu isti añu con nusoutrus
el siñor Venanciu Blancu
que desdi la Argintina,
acercousi a saludanus,
amás pasoulu muy bian
ya llevóu bonus rigalus,
entre Laura ya Verena
abondu bian lu atindiarun.
Dispuás hubu sardinada
igual que todus lus añus,
que pa esu la Cumisión
nunca iscatimóu en gastus.
Ya comu diz el reflán,
qu’el que la vei pirsiguiandu
si nun deixa d’insistir
acábala cunsiguiandu,
aquí nusoutrus San Pedru
bian podemus celebrallu
pos pur fin el Día d’Asturias
vei festejasi n’el puablu.
Ahora hay que trabayar
co lus que l’urganizarun,
pa deixar el pabellón
de lus pixuatus bian altu.
En nuviambri, una vez más
lus del coru cilibrarun
el certamin d’haberas,
igual que todus lus añus,
con esti, ya llevan ochu,
ya siampri van mijurandu,
que pa urganizallu bian,
abondu si tán destandu,
urfionis, de lu mijor,
las vocis paicían del cialu,
¿Qué ti vou cuntar a Ti,
si lus tuvisti debaxu?
Las muyaris de la mar
el sou día festejarun,
nun lis dióu más que lluviara,
ficiara friu o viantu,
pa falar ya rivirtisi,
lu de menus, yá el tiampu,
cantóu el coru Uviñana,
bona cumida, tiatru,
ya un homenaji, a Angelinus
la Recachada i fixarun,
dispuás bellandu entre ellas
la xornada rimatarun,
po lu que Tú puadis ver…..
nun lis fain falta paisanus.
Comu las d’aquí son poucas
ya nisicitan rifuarzu,
de lus conceyus vicinus
más de dusciantas viniarun
pa cilibrar Anfitrionas,
ya tar entre ellas falandu
de lus poblemas que tianin
ya comu lus risulviarun,
llámasi a esu, cunferencias,
peru nun son de teléfanu,
asina nun teneremus
que priucupanus po’l gastu.
Fixarun una vesita
ya un ricurriu po’l puablu
marchándusi muy contentas
de lu bian que las tratamus.
Dispuás feixusi la fiasta
pa todus lus xubilaus,
más de milenta, San Pedru,
en Casa Lupa riuniarun,
tamián tuviarun cumida,
hubu descursus, rigalus,
ya p’acabar con un baili
que ya bonu pa lus guasus.
El nuastru Alcaldi pidíui
a un mandamás del Gubiarnu,
qu’aú taba la Casa’l Mar
s’imprimin céu lus trabayus,
pa que hayga una risidencia
de viayus, aquí n’el puablu,
anqui mijor la punían
en outru llugar más llanu,
que pa subir ya baxar
vei a costanus trabayu.
A primeirus de diciambri
“Gaspar” venu a vesitanus,
peru nun era un Rei Magu
que llegaba adelantau,
tratábasi d’un dilfín
qu’iba algu dispistau,
pensamus vinía d’un circu
pos paicia amaestrau,
¡tinías que vellu xugar
co lus remus d’un chalanu!
peru sigún nus dixarun
más tardi lus deslletraus,
anda faciandu tourismu,
pos ya lu tianin fichau.
Ensiguidina dispuás
las Navidadis llegarun,
tianin poucas diferiencias
co las de lus outrus añus,
rifiarumi mayormenti
a lus asuntus profanus:
farturas a todas horas,
turronis durus ya blandus,
dulcis, tartas ya champanis,
¡cualquiar día reventamus!
co la fami qu`hay po’l mundu
¿nun pudíamus cunciencianus?
En’a Ilesia comu siampri
hubu la Misa del Gallu,
y’anque había pouca xanti
abondu bian lu pasamus,
pos cantamus todus xuntus
lus vellancicus pixuatus,
Chelvi ya Manuel Alfredu
muchu bian lus entonarun.
El día cincu de eneru
con gran luju ya boatu
amontaus en tres carrozas
lus Reis Magus llegarun,
trian rigalus a esgalla,
la crisis nin la anotarun,
bian si ve que d’aú vinían
andan asobraus de cuartus.
Lus niñinus comu siampri,
quedaban embelesaus
ya lus brazus de lus padris,
tamián quedarun cansaus.
Antigus Alunus Selgas
n’el mes d’abril s’alcontrarun
ya con esti son catorci
las vecis que lu fixarun,
entregarun lus diplomas
del cuncursu litirariu,
a una parea de Luarca
que munchu bian isquirbiarun,
yo quixara dais la gracias
po’l d’honor que mi otorgarun,
tuviamus bona cumida,
gueitas ya’l coru autuarun,
ya cabamus comu siampri
co la musica bellandu.
Na Semana Santa, ¿guais?
paez que tamus de saldu
pos piardinsi prusicionis
que de magar cilibramus,
isti añu tocouti a Ti
el día Miárculis Santu,
siría pa nun veti llorar
ya n’el Templu ti deixarun,
o igual foi pa qu’ista vez
nun negaras al Maestru.
¡Tinía que danus virguanza!
¿aú tamus lus pixuatus?
primeiru foi el Incuantru
más tardi el Desenclavu,
(non el que si fai na Ilesia
al de afuara mi rifiaru)
agora fuarun las Lárimas
¿pararemus Patrón Santu?
o vamus siguir pirdiandu
la herencia de nuestrus viayus.
A ver lu que unda nus duran
El Calvariu, el Santu Intiarru
ya las Venias pa cabar
el día Sábadu Santu.
¡Tamus pirdíus, miou probi!
¡nun mandamus nin de viayus!
pos nus xubilaus de la mar,
tián una muyar el mandu.
Graci Pumariega Pola
ya la que vei gobernallus.
Socedéu a Oscar Valle
que nus dexóu’l pasau añu.
Que si prepari l’alcaldi
que ha golvellu lloucu’l tarru,
cuandu nisiciti perras
pa iscursionis ya outrus autus,
¡fura por una paré!
yo ya lu toy advirtiandu,
amás ya de bona tinta
que conozcu bian el pañu.
Con el plan de Zapateru
que asina lu llamarun,
van facer en Villamar
un campu de fugol nuavu,
con vistuarius a tou tren
ya bancada pa sentanus,
dicin que tián una yerba
que nun fai falta segallu,
asina tarán las vacas
con diata adelgazamiantu.
Aú valia poucu la lleichi
con estu ya tirminarun.
Pa poder llevallu a efeutu
nun si punían d’acuardu
lus que tan na upusición
co lus que tianin el mandu;
a mi paezmi, Patrón,
ya si m’intivoucu, inmiandu,
que una cousa que ya bona
pa’l Conceyu ya pa’l puablu,
debin de tar todus xuntus,
a la hora de aproballu,
¡pa xugar a la pilota!
¡non si ya pa un pilutazu!
Ven pa cá, Santu Patrón,
que ti pareceu Furacu,
bian pensei que outra vez más
gulvia ser un frescasu,
pos las osas nun paicían
que quirían acetallu,
peru a fuarza d’insistencia
Tola picóu el anzualu,
ya pa m’idea la carnada
paez que i cabóu gustandu.
Amás él era bian llimpiu
siampri si taba bañandu.
Por Paca haberá qu’asperar
po lu menus outru añu,
qu’ahora tianin qu’hinbiernar
que quiar dicir, tar durmiandu.
Ya falandu d’asperar,
¿aú ta la playa, miou Santu?
¿nun dicían la tiníamus
pa desfrutalla isti vranu?
perdón, vou ritificar
¿aú tá la zona de bañus?
bian pensei que co la crisis
nu imprimaban lus trabayus,
o que la mar la llevaba
sin nusoutrus enteranus.
Prucura la faigan ceu
antis que cabin lus cuartus,
cada vez que falan d’ella
vei baxandu el pirsupuastu,
lus millonis del prencipiu
en ciantus si cunvirtiarun
asina que la rocea
yo teula mitía en cuarpu.
Lu que vei cabar a tiampu
la obra ‘l camín del faru,
¡a tiampu d’inaguralla
con dos mesis de ritrasu!
peru mereceu la pena
pos quedóu abondu guapu;
asperemus que la mar
nun gualva faer más istragus,
ya podamus pasiar
sin piligru muchus añus.
Pa nun perder la custumi
más ilicionis tuviamus,
las primeiras en Galicia
y’al tiampu n’el Pais Vascu,
tantu en un llau comu en outru
hubu cambiu de gubiarnu.
Güi que n’esta ucasión,
lus que pirdiarun, llevarun
un par de bonus rigalus,
unu, un cochi blindau
ya outru un plan debaxu´l brazu.
Dispuás en’as Urupeas
golveu pasar outru tantu,
asina que la turtía
dióu gualta pa ‘l outru bandu.
Tamián feixu Zapateru
outru cambiu de gubiarnu,
pa llevar la ecunumía
ponxu a una muyar al mandu,
son las que sabin, San Pedru,
d’aforrar ya gastar cuartus,
ya comu tamus en crisis
hay que dai a lus dos palus.
¿Mi alma nun la nutastis
pur hí inriba n’el Cialu?
porqui aquí tamus miuo probi
que nun atopamus sualu.
Tan cierrandu las empresas
ya quedandu xanti al paru,
asina, que al nu haber perras
nun pruducimus el gastu,
sin el gastu nu hay cunsumu
ya sin cunsumu, aparamus
el sistema prudutivu
ya yá tou aú imprimamus.
Si nun ti enterasti bian
yá que tás comu’l gubiarnu,
a la diriva, Patrón,
peru sin alcontrar puartu.
La upusición anda igual,
solu que en sintiu contrariu,
ya miantras tantu nusoutrus
siguimus pagandu el patu,
qu’ellus tan intritinius
a lus ispias xugandu,
pagándusi cumisionis,
o cidiandusi contratus,
Pur ciartu, ¡nin si ti ucurra
cambear ahora de capiallu!
nun vaya ser que ti acusin
de que foi algún rigalu,
porque fixisti de baldri
algún que outru milagru,
mira lu que li pasóu
al mandamás valencianu,
por nu alcontrar la fatura
de tres trajis que i fixarun.
En’us Istadus Unius
tianin un mandamás nuavu,
ya y’al primeru na hestoria
que nun ya de color blancu,
peru allí el color contrariu
dicisi afru-amiricanu,
pa m’idea que lus negrus
solu son lus africanus.
De nomi llámasi Obama
muy acertau pa estus tiampus,
cuandu nus vaya mijor
golvemus a bautizallu.
Paez un homi cabal
ya co lus pías n’el sualu
non comu’l que taba anantis
que lus tinía colgando
o inriba d’una mesa
co’l José Mari falandu.
Vou cuntati una nuticia
que lus papelis truxarun,
que d’España, ya n’ Asturias
aú más xanti tá murriandu,
entós haberá que icir,
peru con gran sintimiantu:
¡Paraisu natural,
d’aquí direutu p’al cialu!
Ya pricisamenti ahí tán
lus pixuatus que si fuarun,
pa que Tú lus ricibiaras
co lus brazus bian abiartus,
vou a nomati a dos d’ellus
que ti tarán ayudandu,
a unu ya lu cunucías
pos tiníaslu agrimiau,
Don Ángel Cuervu, el cura
d’Urbanín aquí llamau.
que feixu una gran llabor
trabayandu en sin descansu
por culitivus de probis,
gitanus ya marxinaus
ya pur ú quiara que tuvu
siampri foi muy apriciau.
Dexounus tamián Masvindu,
ahora ya tianis risualtu
lus poblemas que de tráficu
pudiarais tener n’el cialu,
¡si nun lu fixisti ya
has de dai ceu’n xiblatu!
Cuntareiti de currida
lu qu’en mundu ta pasandu,
en Frebeiru en Italia
un bon sustu si llevarun,
tuviarun un tirramotu
que dexóu abondus muartus,
ya tianin un Birlusconi
que mijor taba callandu,
pos cuandu abri la boca,
tián un iscandalu nuavu.
En Somalia hay piratas
que tan atacandu barcus,
¡menus mal que estus tan llonxi,
si non tocábanus algu!
ya ahora que lus intigristas
paicían taban calmaus,
lus curianus del norti
una tómbica botarun,
¡mijor cumian arroz
en ver de xugar con fuau!
que tamus l’humanidá
co’l ripiru diantru’l cuarpu.
Aquí hubu gualga de juacis,
peru sigún nus dixarun,
que tuviáramus tranquilus
que nun la facían por cuartus,
qu’era por falta de medius
nun siría Patrón Santu.
que quirían un enteru….
ya siguru lu alcontrarun
pos falarun co’l menistru
ya nunca más si queixarun.
Vou falati de fugol
imprimandu po’l Uviadu,
que cunsiguiu subir
de catiguría isti añu,
ya ‘l Sporting de Xixón
que si sigui mantiniandu
anqui hasta última hora
lus dos tuviarun temblandu;
tiplicousi ‘l Barcelona
ya’l Madrí foi un frescasu,
sin embargu el Cudillero
siampri taba empatandu,
si en ver de facelu a golis
lu fixara con anzualus,
el palangri Santu Hermosu
allegabavus al cialu.
¡Vaya fiastas, San Pidrín,
ti priparamus isti añu!
nada menus que seis días,
¡nun sei si aguantará ‘l cuarpu!
Las orquestas son bian bonas,
algunas tan ripitiandu,
lu mesmu que las fanfarrias
ya’l que urganiza lus fuaus.
Una novedá muy nuava
vei a dexati asoráu:
¡tres goletas de l’Armada
que nus tan acompañandu!
guay visti a lus mariñeirus
n’a prusición disfilandu
ya’l día de San Pablín
n’el uficiu po lus muartus
pa faer la ofrenda floral
van a salir lus tres barcus.
Pa dai rillustri a las fiastas
iligiarunsi en marzu
a Marta, Sandra ya Silvia
de damas, acompañandu
a Ireni Iglesias, que vei
a ser la que te reinandu.
Danus la Tóu pruteición
que tan solu en Ti isficiamus,
pa que faigas que Cuideiru
vaiga cada día surdiandu.
Prucura que haiga mirluza
ya que lus precius sean altus,
que lus peixis de la mar
si ripruduzcan a ciantus,
pa que asina las ganancias
omentin como asperamus.
Que lus nuastrus mariñeirus
regresin sanus a puartu,
pa golver venus aquí
outra vez diantru d’ un añu.
Agora vou acabar
que teu secu ‘l gargualu,
ya Tú tenerás que ir
a poner ordin n’el cialu,
que igual si ti colóu alguin
miantras tabas aquí abaxu.
Si atopas a unu bellandu,
siguru ya Michael Jacksum.
¡Vivan San Pedru, San Pablu
ya San Pablín que ya’l rabu!
¡Viva Santiagu ‘l Mayor
ya que viva ‘l sou hermanu!
¡Viva San Juaquín, Santa Ana
ya outru viva pa ‘l Paduanu!
que casi a las muciquinas
ya nun haiga cilibatus.
¡Vivan todus lus que tan
guay de vesita n’el puablu!
Un viva muy ispicial
pa lus que tianin asiantu,
¡Ya vivan milenta vecis
lus que hasta aquí lus truxarun!
¡Vivan las otoridadis
que son las que tianin mandu!
¡Ya viva ‘l apuntador
que fai muy bian so trabayu!
¡Que vivan lus dos xigantis
ya que armin un tal istruandu,
que piansis tas en’ as fiastas
de lus morus ya cristianus!
¡Vivan todus lus pixuatus
que s’alcontran llonxi ‘l puablu!
¡Ya viva la nuastra copla
que cada añu cantamus,
en lus bailis, en las danzas
ya pa cabar el rilatu!
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA
CON TODUS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!