En el nombri de Jesús
y la Virgin Soberana,
vou ichar L’Amuravela
comu San Pedru asperaba.
¡Bonus ya filicis días
Almiranti! ti disiamus
desdi’l Sabli de Cuideiru
n’ el día que ya ‘l tou santu.
Comu siampri a cilibrati
acudimus lus pixuatus,
pa dati las novedadis,
cuntati acunticimiantus,
queixanus de las pinurias,
o de lu bonu allegranus,
comu sabemus facelu
con el “caloret” del vranu,
co ‘l d’ iviarnu que lu faigan
Rita ya lus valencianus,
ellus, cilebran las fallas,
nusoutrus nun ti fallamus,
esu facianlu de sobra,
lus que taban gobernandu,
prumitiarun unas perras
que na vida las guliamus,
asina que tianis fiastas
porque si volcou el puablu.
Un puliticu, tian que ser
de palabra ya de pesu,
esus paezmi de palabra…..
que andaban un pucu iscasus
¿si lu outru era en arrobas?
¡tábamus en bonas manus!
asina que nun t’ixtrañi
que pa casa lus botaramus.
Nun quixara disviami
al menus antis de tiampu,
que pa falar d’ estas cousas
teu bian ripletu ‘l sacu,
asina que comu siampri
pa imprimar con el rilatu,
amás de filicitati
comu Patrón que sos nuasu,
quiaru facellu tamián
con el Apostul San Pablu,
que n’a popa de la Ilesia
paez nus ta vigilandu,
hailus que miran pa él
cuandu el petu tan pasandu,
a San Pablín … la verdá,
nun sei si dicili algu,
pos comu todus sabemus
ya un santu estraperlau,
qu’ invintamus pa facer
que lus festejus sean llargus,
ya esi día he diciti,
abondu lu aprovechamus,
con misa po la mañana
po lus defuntus n’el puartu,
ripartin sidra ya bollu
pa la Peña El Pirlindangu,
ya bautizasi el que quiar
co’l agua la Fonti’l Cantu,
-faciandu Sergiu de cura-
pa ser pixuatu adotau.
Peru con esu ya todu
Tú tianis el primer puastu,
que sos el Patrón del puablu
pa lu bonu ya lu malu,
asina que comu veu
que tas prisidiandu el autu,
vou imprimar a cuntati
los socesus que tuviamus.
Lus mareaxis de la mar
cada vez son mas iscasus,
el Cuideiru qu’iba anantis
ya vei disapariciandu,
apenas entra ’l pescau
ya si lu hay a preciu baxu,
con el cupu de la xarda
siguimus pirjudicaus,
isti añu pa rimatar
unda nus lu rebaxarun,
pos dicin que outras costeras
en kilus sobrepasamus,
yo istu la verda, Patrón,
ya algu que nun intiandu,
si dicin que hay peix abondu
¿pa que nus tan limitandu?
lu que había que facer
era nun faelis casu,
que lus qu’ isquilman la mar
nunca fuarun botis nuastrus,
¡que vigilin al que arrastra
peru non al del anzualu!
Asina ya todu ¿guais?
fuamus del añu saliandu.
La mirluza anque barata
compensa lu que pescamus,
el pulpu nun si diou mal,
¡hasta mi tocou prebalu!
peru pa esu a Ramunín
tuviarun que jubilalu,
sinon pa m’ idea piansu
que nun gualu nin un raxu.
Lus del porcebi paemi
que abondu bian si portarun
pos anque baxin lus precius
nunca van a tar baratus,
anque estus ya si sabi
que dependin del tamañu,
cuantu mas gordu mijor
ya tamián que sea llargu,
pa outras cousas sin embargu…
dicin que nu importa tantu.
Las obras del puartu nuavu
fixárunlas en el plazu,
ya risistiu bian el mualli
el temporal d’ esti añu,
asperemus sea de dura
el rimiandu que i mitiarun.
Sin embargu, un virgunciu
sigui siandu lu del Faru,
añu y mediu llevan ya
las barandiallas pol sualu,
nin podemos pasiar,
nin podemos acercanus,
¿peru a ellus que mas lis daba?
si eran todus de secanu,
ya comu nu iban al mualli,
siguru que nun lu viarun,
¡irían curriandu ceu
si fuara pa pañar cuartus!
Co las banderas azulis
socedeunus outru tantu,
au quiara quiarin ponelas
y’ aquí, nin las sulicitarun,
pos dician que nun fain falta
pa que podamos bañanus,
¿igual era en la playina
en lu que taban pensando?
tantu quirian aforrar
que hasta igual nus afogamus,
ricortaban sucurristas
pa nun tener tantu gastu,
peru nun güi dicir
que si baxaran lus sualdus.
Asperu tengamus suarti
al menus por outru llau,
en lus asuntus de pesca
¿quian sabi más que un pixuatu?
ya si tian piscadiría
nun hay quian li meta manu,
pos tenemus a una fema
que pa Europa la iligiarun,
dicisi Eurodepoutada,
¡esu si ya tener rangu ¡
que la sou guala Silica
bian la tuvu emponderandu.
Asperu qu’ Estefania
faiga por el puablu algu,
sinon… comu lus demás,
casta ya tar engañandu.
Vou cuntati outrus asuntus
que tamián nus socidiarun,
pos abondu nus pasou
a lu llargu d’esti añu.
Casi hasta el mes de nuviambri
durou ista vez el vranu,
dispuás vengousi l’iviarnu
pos nun si foi hasta mayu,
istu debi ser dibiu
a esi efeutu invernaderu
pruduciu po lus gasis
que nel ispaciu andan sualtus,
unda han de cabar ichandu
la culpa a lus asturianus,
por el poti, la fabada
ya outras cousas que zampamus.
Falanduti de comer
¿nun si tan intivocandu,
lus que urganizan xornadas
gastrónomas en el puablu?
¿que pintan las de cazuela
fechas con carni o con callus?
o el pinchu de picadillu
con patatas ya con guavu,
Cuideiru, ya mariñeiru
¡hay que faelas de pescau!
con mirluza, curadillu,
o buchus, sulucionau.
En nuviambri el día ochu,
lus del Coru urganizarun
el certamin de habaneras,
comu nun hay pirsupuastu
fixárunlu solu un día,
lus corus, amás del nuastru,
habialus de Canarias,
de Miaris ya outru gallegu,
pa cavar con bona cena
ya baili pa rimatallu.
Lus de la Iscuala de Música
en’a Ilesia axuntarun,
por tercera vez siguida
el seis de junio pasau
a lus corus del conceju,
que cunteilus ya iban cuatru,
comu son todus d’aquí
nun hubu displazamiantu,
ya amás aprovechamus
pa prumucionar lu nuastru,
¡puadin faesi bian las cousas
gastandu muy poucus cuartus!
En Navidá daba nouxu
andar po la cai pasiandu
nin una lluz, San Pidrín
nus ponxu el Yuntamiantu,
bian pensei que a última hora
iban a ponenus algu,
yo ya nun sei que pensar,
si foi po la falta cuartus
o po la falta de llucis
del iquipu de gubiarnu.
Asina ya todu, ¿guais?
de cilibrar nun deixamus,
hubu Cabalgata Reis
que si salvou de melagru,
pos güi dicir que al paji
encargau d’urganizallu
entrarunli lus ladronis
ya las perras li llevarun,
peru lus Magus d’Urianti
a la cita nun faltarun
nin pa tar co lus niñinus,
nin pa traeis lus rigalus.
Tampoucu falto na Ilesia
el Belen que si fai diantru,
con todu luju detallis
ya piazas en muvimiantu.
Nun quiaru dexar pasar
po lu bian que lu pasamus,
tar cantandu po lus baris
lus vellancicus pixuatus,
estu comu ta bian fechu
hay que siguir ripitiandu,
¡asina que ya sabeis
asperuvus pa isti añu!
Al pequeñu Nicolás
¿nun lu visti por el puablu?
(yo con esi nombri vi
a unu que iba de Rey Magu)
que raru que nun viniara
facer cuntigu un ritratu
¡debis ser el que li falta!
siguru que anda con miadu
a que lu veas marrulleru
ya lu mandis pa’l infiarnu.
Total anqui lu dinuncin
siguru que queda sualtu,
tan lus juacis Santu Hermosu
que nun hay puru garrallus,
amás comu últimamente
solu a ricus tan juzgandu,
paez que tan dexandu adredi
qu’ el tiampu vaya pasando,
ya asina dexanlus llibris
porqui priscribin lus casus,
a lus probis al menutu
ya lus andan desahuciandu
o dexanlus sin las perras
po la firma de un contratu.
Ven pa acá, dimi la verdá,
siguru que nun ti diarun
ninguna tarjeta de esas
que tuviarun ripartiandu,
menus mal, sinón tarías
a estas horas imputau,
anque debi tar de moda
porqui hasta lus hay n’el puablu,
ya todus tuviarun ¿guais?
en llaboris de gubiarnu,
esu siguru que ya ….
¡porque muy bian lu fixarun,!
firman sin saber que firman
ya dicidin en sin dualu,
fan lu que lis da la gana
solu porqui tan mandandu,
peru hay una palabra
que unda nun la diprindiarun,
ya la responsabilida
del que un cargu ta ostentandu,
pos tan ahí, pa sirvir,
non pa tasi aprovechando.
Lus casus de currución
nun si caban nin quiriandu,
si pensabamus que aqui
en Asturias nus llibrabamus,
saliu Villa con unas perrras
que dixu había heredau,
lu que feixu foi blanquiar
cuartus que si li apeganun,
pos si el era mineru…
-d’esu iba prisumiandu-
nunca vi a ningunu ricu
solu viviandu del sualdu.
Estu mesmu, San Pidrín,
hay que aplicallu a outrus casus,
que si nun si sabin guay
poucu a poucu iran saliandu,
sin ir más llonxi, ahí tianis,
¿que ti paez lu de Ratu?
tan arriba que llegou
¡ya que baxu ta quedando!
perras nun van a faltali
¿peru el honor, Patrón Santu?
esi nunca más jamás
vei poder ricuperallu,
nin tampoucu lus cujinis
que li disapariciarun.
Falandu d’ estus asuntus
foisimi el santu pa’l cialu,
ya deixaba de cuntati
outras cousas que pasarun,
el antroyu comu siampri
con desfracis cilibramus,
paez que n’ ista ucasión
más mijor l’urganizarun,
po la tardi lus niñinus
en un disfili saliarun,
ya po la nuachi lus grandis
con discu-móvil bellandu.
Nas Comadris las muyaris
todas a cenar saliarun,
menus mal que nun las vimus
pos vansi fuara del puablu,
po las aldeas vicinas
si andubiarun ripartiandu,
güi que a Manuel Alfredu
Churi si-i tuvu queixandu,
que si pa’l añu que vian
ta el mesmu boy ripitiandu,
vei cambear de ristoran
qu’asina hay material nuavu,
a esti ya i lu tian mas vistu
que a Manolu cucinandu.
Venu la Simana Santa
con friu peru bon tiampu,
pudiandu asina salir
las prusicionis po’l puablu,
anque cada vez, hay menus
xanti que vei co lus Santus,
a las pruabas mi rimitu
igual que lu tas Tú viandu,
pos o bian nun si cilebran
o acudimus cuatru gatus,
dibiriamus pensar
mirar pa riurganizallu,
al Calvariu pouca xanti
ya con un friu d’espantu,
llibrousi bian comu siampri,
esu si, el Santu Intiarru,
ya las Venias dati gustu
de lu bian que las fixarun.
Dipuás la chocolatada
ya pal mualli a cilibrallu,
que la Fiasta el Pescador
taba con carpa asperandu,
lu mesmu que en San José
que tamián lu cilibramus,
anque en aquella ucasión
casi salimus a nadu
pos entrou la pleamar
hasta ‘l llau del escenariu.
La que si entrou en la cárcil,
foi la Pantoja, miou Santu,
pensaba qu’iba llibrar
peru el xuez dixui.. ¡pa diantru!
ya nun entras por cantar,
sinón por tar blanqueandu
el diñeiru de Marbella
que outrus tuviarun robandu.
Anqui si fuara por estu
muchas cárcilis llenabamus,
ya ti rilatei anantis
algunus de esus casus,
peru unda quedan más
¡ya lus que iran saliandu.!
Miantras tantu anque nus digan
qu’ el país vei mijorandu,
na más veu que lus ricus
son lus que van xurriciandu,
lus bancus ganan más perras
dispuás que lus riscatamus,
peru el sualdu del obreru
sigui tandu po lus sualus,
la juventu tian que isi
porqui aquí nun hay trabayu,
sanida … educación
todu tan privatizandu,
pa prestaciones sociales
hay cada vez menus cuartus,
ya anque pridiqui Rajoy
que nus baxan lus impuastus,
¡ya mintira, San Pidrín,!
por outru llau tan subiandu,
asina que comu ves
siampri lus mesmus pagamus
pal gubiarnu del Estau
o pal d’esti Yuntamiantu,
que pa pagar la viñeta
el cochi vei qu’ir vindiandu,
el agua que sal del grifu
¡mineral nus la tan dandu!
o asi dibiría de ser
al preciu que la pagamus,
la basura nun m’ixplicu
porque la taban cobrandu,
si tinian que paganus
po lu gochu qu’ iba el puablu,
au taba el cocedor
dabati nouxu mirallu,
dibia haber una de biarbinis…
¡pa morrer todus encetaus¡
¿qué pensarían lus que vianin
a Cuideiru a vesitanus?
pos d’excelencia touristica
bian poucu iba quedando,
“d’excremencia” diría you
lu tinían que ir llamandu.
Cuntareiti mareaxis
que por el puablu pasarun,
lu de Jaimi co lus patus
¿nun hay manera arreglallu?
l’outru añu, lus ladronis
que viniarun a robailus,
¡hasta ofreceu ricompensa
pa poder ricuperallus!
ya esti que paicia tranquilu
¡zampoi la raposa cuatro!
has falar con San Antón
a ver si puadi faer algu,
qu’el probi de lus disgustus
tian que ir pa la cama malu.
Una superasturiana
tenemos agora en puablu,
ya la fia de Masvindu,
la pequeña, mi rifiaru,
prisintousi a esi cuncursu
ya casi acaba ganando,
sempatica.. nun la hay más
ya siampri colaborandu,
lu mesmu en un fistival
que co lus Magus baxandu,
has dai salú San Pidrín
¡que siga asi abondus añus!
¿Qué i pasou con unus inguilis,
mi dixarun, al Pravianu?
pidiarunli un capuchinu
ya’l paicer nun s’intindiarun,
¿pensaría qu’era un fraili
por quian taban priguntandu?
cuandu supu era un café
lu que li taban pidiandu
dixuis que la cafetera
de tres tipus vinía dandu,
solu, cortau o con lleichi,
esu si, en taza o vasu,
que si lu quirian bian
ya sinon fuaran andandu.
Tianis un nuavu menistru
desdi’l pasau mes de mayu,
que si ordenou Luis José
en la catedral d’Uviadu,
ya de familia cristiana
bian cunucia n’el puablu,
has ayudalu San Pedru
a cuidar por el rebañu,
qu’ anda mucha ovea sualta
ya nun corrin bonus tiampus.
Inclusu diantru la ilesia
la vanida va omentando,
pos nun ya igual pridicar
que dispuás tar trigu dandu
¿o a Roucu nun li avastaba
un pisu mas atotau?
piansu qu’en estus asuntus
tianin qu’ir con mas cuidiau,
hay muncha xanti en sin techu
ya abondu nisicitau.
¿Deprindisti a bellar
sivillanas, Patrón Santu?
pos con la Duquesa d’Alba
siguru que tianis tratu
que Tú sos de alta alcurnia
ya alguna fiasta fixarun,
mira ver si li prisentas
al Francés ya a Viriatu,
que si nus fuarun lus dos
pa cuntigu isti añu,
pos comu dicin que iba
muyar llana ya del puablu,
nun vei a pasalu mal
con esti par de pixuatus,
lu pior vei ser pa Ti
que ha ritrasasiti’l suañu,
¡puadis ir al calamar
con Indaleciu el del Guayu!
A algunu si i ritrasou
el vinticuatru de mayu,
pos tuviamus ilicinis
d’alcaldis ya deputaus,
al nun haber mayurías
dicin hay que facer patus,
¿será istu cousa de picu
ya antis facían el gansu?
anque agora pa m’idea
a lu menus en el puablu
paemi son las gavioutas
las que nus tan gobernandu,
ya ti cuntarei que fan
d’ aquí a diantru d’ un añu,
pos lus outrus San Pidrín…
¡taban fechus bonus páxarus!
Tú por el bian de Cuideiru
has precurar ayudalus,
isti paez nun vei folgar…
apillidasi Iscribanu.
Falareiti de fugol, que
foi densu ‘l campiunatu,
el Cudillero primeru
cabou disapariciandu,
ya surdiu el Marinu
qu’era l’ iquipu d’antañu,
cunsiguiu ascender
a sigunda el Rial Uviadu,
paez que lis sentou bian
el curriu mijicanu,
ya ‘l Sporting de Xixón
tamián acabou subiandu,
co lus guajes de Mareu
ya con el “Pitu Abelardu”.
El Barça fixu tripleti
¡pitus ya palmas lis damus!
el que si quedou sin titulus
foi el Madrí isti añu,
¡como la Infanta Cristina
que tamián i lu quitarun!
al Valdreu de fugol sala
debemus filicitallu,
pos quedarun lus primerus
ya xugan neñus pixuatus.
Las fiastas como saberás
tianin poucu pirsupuastu,
pos hay que pagar el pufu
que dexou el Yuntamiantu
y’ anque sean un día más
ya ‘l programa sea amplu,
las orquestas ista vez
nun son de las de primer planu,
peru han facellu muy bian
pa bellar en sin descansu,
amás en sin aparar
discus Jaimi ha tar puniandu.
Misas solenis a diariu
prusicionis co lus Santus,
mañana Sacramental
con alzombrau por el sualu,
que pa faelu las muyaris
abondu si tan destandu.
Hay barracas comu borra
ya güi dicir qu’ esti añu
la pista cochis de choqui
el “Chiquilis” ta puniandu,
experiencia tian abonda
ya tamián entrenamiantu.
Pa’l que quiara comprar cousas
tian mercau n’ el puartu viayu,
ya tamián pa San Pablin
habera bailis pixuatus,
comu ves, nu hemus tener
nin plizca d’ aburrimiantu.
Ya vou tirminar, Patrón,
que lus añus van pesandu,
ya cada vez costa más
subir ya baxar del barcu,
¡Tú tas muy a gustu ahí!
peru yo quedu sin fualgu,
asina que vou piditi
pa que trabayis Tú algu,
nus deas la prutición
ya l’ayuda desdi ’l cialu,
qu’ el pescau nunca nus falti
nin la salu pa ir pescallu,
has traenus de la mar
en paz, pa tar co lus nuasus.
Illumina a lus que tan
gobernadu el Yuntamiantu,
a ver si puadin facer
que surda outra vez el puablu,
tendremus que dar la gualta
pa nun siguir enterrandunus,
pos dexarunnus lus outrus
co la cabeza p’abaxu.
Co lus vivas, comu siampri
la dispidida ti damus,
ya si todu marcha bian
vemunus diantru d’un añu.
¡Viva San Pedru que ya
el Patrón del nuastru puablu!
Comu pridicou con él,
¡Viva el apostul San Pablu!
Ya que viva San Pablín
que ya solu santu nuastru.
¡Vivan San Juaquin, Santa Ana
ya lus que al monti subiarun!
¡Vivan lus Santus ya Santas
que ti tan acompañandu!
¡Pa lus del Ayuntamiantu,
na más un vivina is damus!
que si nus gubiarnan bian
ya is lu iremus omentandu.
¡Vivan todus lus que tais
guay el sirmón iscuchandu!
Pa lus que nun tan aquí
¡Un viva tamián lis damus!
¡Lu que tian que vivir siampri
a lu llargu de lus añus,
ya la copla que llevamus
n’el corazón lus pixuatus,
que la ricitu n’el Sabli
ya güisla desdi’l Cialu!
¡MIENTRAS CUDILLERO VIVA
Y DURI LA FUENTI’L CANTU,
VA SAN PEDRU A LA RIBERA
CON TODUS LUS DEMÁS SANTUS!
¡Amura vela! ¡Isa vela!
¡Fuego a babor! ¡Fuego a estribor!
¡¡¡Viva Pedro!!!